प्रथम कन्काई कप फुटबलको उपाधि लमजुङ एफ सीको पोल्टामा, उप विजेता धरान एफ सी

३१ जुलाइ २०१८, सिओल

झापा मिलन समाज दक्षिण कोरिया र झापा एफ सीको आयोजनामा” प्रथम कन्काई कप २०१८” नामक फुट्बल प्रतियोगिताको उपाधि लमजुङ एफ सीले आफ्नो पोल्टामा पार्न सफल भएको छ।

कुल २० टिमको सहभागिता सहित “खेलकुदको विकास,अनुशासन र गतिशीलता, प्रवासमा पनि हाम्रो योगदान र निरन्तरता” भन्ने मुल नारा सहित झापा एफ सी आपतकालीन राहत कोष स्थापनार्थ आईतबार जुलाइ २९ तारिक सिओलको सोयोसन फुटबल ग्राउण्डमा निर्धारित समयमा गोल रहित भएपछि ट्राईबेकरमा ५ का विरुद्ध ४ गोलको अन्तरले उपाधि हात पार्न सफल भएको थियो।

उक्त प्रतियोगितामा आयोजक टिम झापा एफ सी र मगर एफ सीलाई क्रमश लमजुङ एफ सी र धरान एफ सीले पराजित गरेको थियो भने प्रतियोगिता बाट प्रथम हुने टिमलाई नगद २५ लाख कोरियन वन र द्वितीय हुने टिमलाई नगद १२ लाख कोरियन वन सहित ट्रफी, प्रमाणपत्र,मेडलले सम्मानित गरेको थियो। यसैगरी उत्कृष्ट गोलकिपर लमजुङ एफ सीका छिरिङ लामा, सर्वाधिक गोलकर्ता झापा एफ सी का हाङसु लिम्बु ,उत्कृष्ट खेलाडी धरान एफ सी का निशान्त श्रेष्ठ लाई उचित पुरुस्कार तथा प्रमाणपत्र सहित सम्मान गरेको थियो। यसैगरी उत्कृष्ट टिम गुनसान एफ सीले सम्मान सहित ट्रफी प्राप्त गरेको थियो।

फुटबल प्रतियोगिताको औपचारिक कार्यक्रमको प्रमुख अतिथि नेपाली दूतावासबाट महामहिम राजदुत अर्जुन जंगबहादुर सिंह, बिशिष्ठ अतिथिमा दोङदुछन सिटीका मेयर छोय योङदक,सिटि काउन्सलर लि सुङ सु र यसैगरी बिशेष अतिथिहरुमा एनआरएनए कोरियाको अध्यक्ष लक्ष्मी लामा,समाजका संरक्षक एवं एनआरएनए कोरियाका संस्थापक अध्यक्ष केपी सिटौला,वोमन फर वोमनका अध्यक्ष पदमा श्रेष्ठ र नेपाल फुटबल महासंघ दक्षिण कोरियाका अध्यक्ष कृष्ण गुरुङ लगायत अन्य अतिथिहरुको उपस्थिति रहेको थियो । समाजका अध्यक्ष राजु सन्तोषी थापाको सभापतित्वमा सम्पन्न औपचारिक कार्यक्रमको संचालन भने सह सचिव आन्नद अधिकारीले गर्नु भएको थियो।

उक्त प्रतियोगितामा विजयी हुने टिम र पुरस्कृत खेलाडीहरूमा हार्दिक बधाईका साथ सहभागी सबै टिमलाई विशेष धन्यवाद सहित प्रमाणपत्र प्रदान गरेको थियो। प्रतियोगिता सफलतापुर्वक सम्पन्न गर्नको लागि प्रत्यक्ष तथा अप्रत्यक्ष रुपमा विभिन्न क्षेत्रबाट हर किसिमको आर्थिक,भौतिक तथा नैतिक रूपमा सहयोग गर्नुहुने सम्पूर्ण सहयोगी महानुभावहरु,अतिथि ज्यूहरु, व्यावसायिहरु, रेफ्रीहरु लगायत उपस्थित सम्पूर्ण फुटबल प्रेमी नेपाली दाजु भाइ तथा दिदीबहिनी हरुलाई हार्दिक धन्यवाद व्यक्त गर्दै खेलकुदको दौरानमा घाइते हुनु भएका खेलाडीहरूको शिघ्र स्वास्थ्यलाभको कामना सहित उपचारार्थ सक्दो सहयोग गर्ने प्रतिबद्धता जनाएको छ ।