कोरिया जानेको लर्को

कुम्भराज राई

ओखलढुंगा-केही वर्ष अघिसम्म उमेर १६ लागेपछि थाक्ले गाविसका युवा बेलायती सेना र सिंगापुर प्रहरीमा भर्ना हुन कसरत सुरु गर्थे । लाहुरे हुने सपनाकै कारण पढाइ छाडेर भविष्य बर्बाद बनाउनेको कमी थिएन । लाहुरे बन्न नसकेका युवा खाडी मुलुकतिर हान्निन्थे ।

अहिले परिस्थिति फेरिएको छ, लाहुरे हुने तयारीभन्दा कोरिया जान भाषा सिक्नेको लर्को धेरै छ । थाक्लेका ५, ६, ७, ८ र ९ वडा ३४ जना कोरिया पुगिसकेका छन् । हिलेपानी, जाक्मा र सोक्माटार गाउँमा कोरिया जाने चलन बढेको छ ।

यसरी सुरु भयो लहर

७ वर्षअघि बेलायती सेनामा भर्ती हुन नसकेपछि निराश भएका ८ युवा ललितपुर इमाडोल चोकको चिया पसलमा दिन काट्दै थिए । एक दिन ईपीएसमार्फत कोरिया जान सकिने उनीहरूले सुने । गाउँकै पचुराम राईले मासिक लाखौं कमाउन सकिने बताए । त्यसपछि उनीहरू भाषा सिकेर ईपीएस परीक्षाको तयारीमा लागे । त्यसयता हाम्रो गाउँबाट कोरिया जाने युवा कुनै वर्ष छुटेका छैनन्,’ हाल कोरियामै रहेका नरेश बाम्बुलेले भने, ‘एकले अर्काको सिको गर्दै आइरहेका छन् ।’ उनका अनुसार ३४ जनामध्ये ४ कृषि र अन्य सबै औद्योगिक क्षेत्रमा कार्यरत छन् । ती सबै बाम्बुले राई समुदायका हुन् । हिलेपानीबाट एकै घरका ४ दाजुभाइसम्म कोरियामा रोजगारीमा छन् ।

कोरिया पुगेर मासिक न्यूनतम १ लाख रुपैयाँ कमाइ हुने गरेको छ । उक्त रकम भने अधिकांशले अनुत्पादक क्षेत्रमा लगानी गरेका छन् । ९० प्रतिशतले घर र जग्गामा लगानी गरेका छन् । गाउँमै घर बनाउनेदेखि सुनसरीको तरहरा र धरान, उदयपुरको कटारी तथा ललितपुरको इमाडोल क्षेत्रमा घरजग्गा किनेका छन् ।

संगठित बन्दै समाज सेवामा

एकै समुदायबाट ठूलो संख्यामा कोरिया पुगेका बाम्बुले राई समुदायका युवाले संगठित बन्दै सामाजिक काम थालेका छन् । उनीहरूले खेलकुद, स्वास्थ्यलगायत क्षेत्रमा सहयोग गर्दै आएका छन् । बाम्बुले राई स्पोर्ट्स क्लबलाई ७५ हजार, हिलेपानीबाट कोरिया पुगी स्वास्थ्य समस्या भोगिरहेका राजन राईको उपचारमा १ लाख ८० हजार, नेपाल आइडलका फस्ट रनर अप बुद्ध राईलाई २३ हजार सहयोग गरिसकेका छन् ।

यस्तै, ओखलढुंगा सेवा समाज नामक संस्थासँग सहकार्य गरी भूकम्पबाट जिल्लामा ज्यान गुमाएकाहरूका परिवारलाई पनि नगद सहयोग गरेका छन् । जनही मासिक रकम संकलन गर्ने गरेका छन् । सन् २०१६ भित्र एम्बुलेन्स खरिद गर्ने लक्ष्यका साथ रकम संकलन गरिरहेको कोरियाबाट नरेश बाम्बुलेले बताए ।