तरकारी बेचेरै बार्षिक ४० लाख
फोनिज कोरिया संवाददाता
चितवन – रत्ननगरका तरकारी कृषक जीवसलाल राउत रौतहटबाट चितवन आउँदा खेतमा काम गर्ने मजदुर थिए। तर आफै तरकारीखेती गर्न थालेपछि भने उनले अरु मजदुरलाई काम दिनसक्ने भएका छन् । “यता आउँदा दिनको रु दुईसय खेतमा मजदुरी गरेर कमाउथे” उनले भने,” “अहिले आफ्नै तरकारी बेचेर वर्षको रु ४० लाख कमाउँछु ।” उनले गीतानगरमा १० बिगाहा क्षेत्रफलको खेतबारीमा एक्लै तरकारीखेती गरेका छन् ।
जहाँ १८ जना मजदुरले रोजगारी पाएका छन् । करेला, रामतोरिया, ,गोलभेँडा, लौका, चिचिन्डो, घिरौला, काँक्रा, खुर्सानी, भन्टा, बोडीलगायतका तरकारी उनको खेतबारीमा फलिरहेका छन् । करेलामात्र उनले तीन बिगाहामा लगाएका छन् । “सुरुमा मजदुर थिएँ अहिले मालिक भएको छु” उनले भने । उनी विसं २०४६ मा रौतहटबाट काम खोज्दै चितवन छिरेका हुन् । खेतबारीमा काम गर्दागर्दै एकदुई कट्ठा जग्गा भाडामा लिएर तरकारी लगाउन थाले । त्यसपछि बचेको पैसाले भाडाको जग्गा बढाउँदै गएपछि एक्लैले १० बिगाहाको तरकारीखेती गर्नसक्ने बनेको उनले बताए ।
उनले झै आफ्नै तरकारी खेतीबाट नाम र दाम दुबै कमाउनु भएको अर्का किसान चन्द्रबहादुर अधिकारी आफू मात्र होइन गाउँका अरु किसानलाई पनि खेतीमा सघाउछन् । फूलबारी क्षेत्रमा उनले गरेको प्राङ्गारिक तरकारीखेती हेर्न स्वदेशका विभिन्न क्षेत्रबाट किसान आउने गर्छन् । “गाउँका २०० भन्दा बढी किसानलाई सहकारीमा आवद्ध गराएर खेती गरिरहेको छु” उनले भने । सहकारीले लाखाैको कारोबार गर्छ । मल, बीउ र तरकारी तथा अन्न उत्पादनमा कहलिएको उनले थुप्रै सम्मान र पुरस्कार पनि पाएका छन् ।
चितवनको पश्चिमी भेग अहिले तरकारी खेतीका लागि फस्टाउँदै गरेको क्षेत्र हो । यहाँका किसान मौसमी बेमौसमी तरकारीखेती गरेर आफू मात्र होइन अरुको परिवारलाई पनि आम्दानीको बाटो देखाउने गर्छन् । विदेश जान लागेका युवा, विदेश गएर फर्किएका र नितान्त बेरोजगार भएका युवालाई लक्षित गरेर नेपाल सरकारले चलाइरहेको अनुदान कार्यक्रममा उनीहरु पनि सहभागी छन् ।
वरिष्ठ कृषि अधिकृत सोमनाथ घिमिरेका अनुसार सरकारले मध्य पहाडका नौ तथा तराईका १६ जिल्लामा यो कार्यक्रम लागू गरेको छ । उक्त कार्यक्रम अन्तर्गत यहाँ ४७ बिगाहा क्षेत्रफलमा तरकारीखेती भइरहेको छ । जिल्लामा छ हजार २०० हेक्टरमा तरकारीखेती हुने गरेको छ ।
