प्रेस विज्ञप्ति जारी गर्दै आदिवासी जनजाति महासंघ कोरियाको पहिलो बैठक सम्पन्न
नेपाल आदिवासी जनजाती महासंघ दक्षिण कोरियाको पाँचौ महाधिवेशनबाट निर्वाचित नयाँ कार्यसमितिको पहिलो बैठक महत्त्वपूर्ण निर्णयहरू गर्दै सम्पन्न भएको छ। डिसेम्बर १७ तारिख आइतबारका दिन महासंघका नवनिर्वाचित अध्यक्ष पवन चाम्लिङ राईको अध्यक्षतामा सउल स्थित नेपाल हाउसमा बसेको बैठकले विगत केही वर्ष यता एनसिसी कोरियाले चुसक, सलनालमा गरिने सांस्कृतिक कार्यक्रम बाँडफाँडको क्रममा यहाँको जातीय संघ संस्थाहरु माथी गरेको विभेदलाई लिएर चिसिएको संवन्धलाई सुदृढ गर्दै विदेशी भुमिमा नेपाली बिचको एकता र सामाजिक संस्थागत सदभावलाइ कायम गर्नको निमित्त यस अगाडीको कार्यसमितिले गरेको निर्णयमा आधारित रहेर एनसीसी संग औपचारिक वार्ता गर्ने निर्णय गरेको छ।
त्यस्तै महासंघलाई अगाडी बढाउन सदैव सल्लाह, सुझाब र सहयोगको अपेक्षा गरि निवर्तमान अध्यक्ष चित्र बहादुर मोक्तान अध्यक्ष प्रमुख सल्लाहकार रहनेगरी सल्लाहकारहरु पनि चयन गरेको छ।
यसै गरि महासंघको मातहतमा पोखरामा अध्ययनरत २ जना छात्राहरुलाई १० कक्षा सम्म पढाइदिने सुरुवाती लक्ष्य अनुरुप त्यसलाई निरन्तरता दिनको निमित्त आर्थिक लेखाजोखा, मुल्यांकन गर्ने गरि महासंघमा रहेर यसमा योगदान दिनुहुने विभिन्न ब्यक्तिहरु सम्मिलित एउटा समिती निर्माण गर्ने निर्णय गरेको छ भने महासंघलाई चलायमान गराउदै लैजानको निमित्त विभिन्न उपसमितिहरुको महसुश गरि विभिन्न विभागहरु गठन गर्ने निर्णय अनुरुप तत्काल उपाध्यक्ष बाबुलाल मोक्तानको संयोजकत्वमा सांस्कृतिक विभाग र महासंघकै अंग फोनिज कोरियाका अध्यक्ष मन्जु गुरुङको संयोजकत्वमा संचार विभाग गठन गर्ने निर्णय गरिएको छ भने पाँचौ अधिवेशनबाट रिक्त रहेको पदमा महिला सदस्य तर्फ सपना सेलिङलाई मनोनित गरिएको छ।
आउदै गरेको सलनालमा गरिने सांस्कृतिक कार्यक्रम बाँडफाँड गर्ने गरि आयोजित कार्यक्रममा विभिन्न जातिय संघ संस्थाहरुको अध्यक्ष,प्रतिनिधिहरु लगायत अन्यको उपस्थिती रहेपनी कार्यक्रम गर्ने महासंघ अन्तर्गतको संघ संस्था नभएकोले यसपाली सलनालमा भने महासंघ मातहत कुनैपनी संस्थाको सांस्कृतिक कार्यक्रम नहुने भएको छ।
यसै गरि महासंघले नेपालमा भर्खरै सम्पन्न चुनाबमा प्रतिनिधि सभातर्फ कैलाली क्षेत्र नं १ बाट अत्यधिक मत ल्याई बिजयी हुनुभएका आदिवासी थारु समुदायका अगुवा/अभियन्ता रेशम चौधरीलाई बिजयको प्रमाण पत्र दिन निर्वाचन आयोगले गरिरहेको आनाकानी र जालसाजी भनेको आदिवासीहरु माथि राज्यले गर्ने विभेदको अर्को पराकाष्ठा हो र यस्तो निन्दनिय कार्यको घोर भर्त्सना गर्दै अविलम्ब बिजयको प्रमाणपत्र प्रदान गरियोस भन्ने सरकारसंग जोडडार माग गर्दै प्रेस विज्ञप्ति जारी गरेको छ।
