संगीतलाई अगाडि बढाउने सुरेनको चाहना
फोनिज कोरिया सम्वाददाता
दक्षिण कोरिया, रेडियोमा बज्ने गीत उनी हुबहु उतार्थे । गाउँबेंशी, मेलापात र गोठालो गर्दै गीत गाउदा बनजंगल, पाखा पखेरो उनको स्वरले गुन्जयमान हुन्थ्यो । उनी सानैदेखि गीत गाउन भनेपछि हुरुक्कै हुन्थे । गायनप्रतिको रुचि र उनको सुमधुर स्वर सुनेर साथीभाइ मात्र होइन अग्रजहरुले समेत हौसला दिन्थे । स्वर मिठो छ भन्दा उनी फुरुंग हुन्थे । तर उनले गाउनलाई व्यवसायिक रुप दिन र अगाडि बढाउनकै लागि भनेर गायनसम्वन्धि कुनै औपचारिक शिक्षा लिएनन् । समय मिलेन वा उचित ठानेनन् । तर अब उनको एउटै उदेश्य छ, नेपाल फर्केपछि संगीतसम्वन्धि औपचारिक शिक्षा लिएर गायनलाई अगाडि बढाउने । विगत साँढे चारवर्षदेखि दक्षिण कोरियामा श्रम गरिरहेका यिनै युवा प्रतिभा हुन् सुरेन बान्तवा ।
केही समय अघि भएको ह्वाट्स एप अनलाइन नेपाली तारा गायन प्रतियोगितामा उत्कृष्ट सुरेन बान्तवा सौखले मात्र फुर्सदमा गाउदै आएपनि अब भने जिम्मेवारी समेत बढेको महशुस गरेका छन् । विश्वभर छरिएर रहेका नेपालीहरुको लुकेर रहेको प्रतिभालाई बाहिर प्रस्फुटन गर्ने उदेश्यले संचालन गरिएको उक्त गायन प्रतियोगिताले उनको प्रतिभालाई मात्र बाहिर ल्याएन गायनमा लाग्ने राम्रो प्लेटफम समेत दिएकोमा उनी मख्ख छन् । भन्छन्, ‘अब नेपाल फर्केपछि गायन क्षेत्रमै लाग्नेछु ।’ आफ्नै भाइ पूर्ण राईले समेत गायन प्रतियोगितामा भोजपूर आइडल अवार्ड जितेकोले पनि नेपाल फर्केपछि भाईसँगै गीत रेकर्ड गर्ने योजना बनाएका छन् ।
‘१४, १५ घण्टा काम गरेर गायन प्रतियोगितामा समय मिलाउन एकदम कठिन भएको थियो’, उनी सम्झन्छन् । तैपनि लामो ड्यूटीबाट निस्केको समयलाई उनी गायन अभ्यास र अनलाइनमार्फत् गायन प्रतियोगितामा सहभागिता जनाउदै गए । अन्तत उनको मेहेनत, साथीभाई र निर्णायकहरुको हौसलाले उनलाई उत्कृष्ट अवार्ड हात पार्न सफल बनायो । ‘प्रवासमा काम गर्दै गीतसंगीतमा लाग्न साह्रै गाहे छ । वास्तवमा मैंले गायनलाई भने कहिल्यै समय छुटाउन सकिन’, उनी भन्छन् । गीतसंगीतबाहेक नाम चलेको पुस्तक पढ्ने र घुम्ने उनको रुचि हो । । त्यस्तै स्वदेश फर्केपछि केही रमणिय स्थलहरु घुम्ने उनको अर्को रहर पनि हो ।
