आणबिक परिक्षणले तताएको विश्व : समाचार विश्लेषण

उत्तर कोरियाले मंगलबार लामो दुरीको आणबिक क्षेप्यास्त्रको सफल परिक्षण गरेको छ । जसले लामो दुरीसम्म मार हान्न सक्नेछ । अब प्योङयाङले अमेरिकी भुभागमा क्षेप्यास्त्र प्रहार गर्न सक्ने जनाएको छ । मंगलबार गरिएको परिक्षण कति शक्तिशाली भनेर स्वतन्त्र पुष्टि नभए पनि अहिलेसम्मकै सबै भन्दा बिकसित रुप हो भन्नेमा अमेरिका पनि बिस्वस्त छ ।
अहिले प्योङयाङसँग भएको क्षेप्यास्त्रको विकास गर्न अझै धेरै बाँकी भएको बीबीसीले लेखेको छ । क्षेप्यास्त्रको अघिल्लो भागमा अटाउने गरी आणविक विस्फोटक वस्तुलाई सानो आकारमा ढाल्नुपर्नेछ । साथै पृथ्वीको वायुमण्डलीय तहमा पुनः प्रवेश गर्दा सामना गर्नुपर्ने अवरोधबाट त्यसलाई जोगाउनुपर्ने पनि उल्लेख छ । यद्यपी विश्वलाई नै उत्तर कोरियासँग भएको क्षेप्यास्त्रको बारेमा धेरै थाहा छैन ।
आणबिक परिक्षण गरे पछि विश्व भरिबाटै उत्तर कोरियालाई उक्त कदम रोक्न दबाब आएको छ । रुसको भ्रमणमा रहेका चीनका राष्ट्रपति सी जिन पीङ र उनका समकक्षी भ्यादीमीर पुटिनले उत्तर कोरियाको कामले विश्वलाई अशान्त बनाउन सक्ने बताएका छन् । उनीहरुले यस्तो कदम रोक्न पनि प्योङयाङलाई भनेको छ । तर चीन र रुसको उत्तर कोरियासँगको सम्बन्धलाई लिएर अमेरिका बिस्वस्त छैन । अमेरिकाका राष्ट्रपति डोनाल्ड ट्रमले चीनले खासै उत्तर कोरियाको समस्यामा खासै वास्ता नगरेको भनेका छन् ।
दक्षिण कोरियाका राष्ट्रपति मुन जे इन उत्तर कोरियाको समस्या वार्ताबाटै समाधान गर्नु पर्छ भन्ने मान्यता राख्ने नेतामा पर्छन् । उनले अब आउने हिउँदे ओलम्पिकमा दुबै देशका खेलाडी एउटै झन्डामुनी मिलेर सहभागिता हुनु पर्छ भनेको एक महिना नबित्दै प्योङयाङको यस्तो रबैया आएको हो ।
विश्वले जे भने पनि उत्तर कोरियाका शासक किम जोङ उनलाई भने फरक नपरेको जस्तो देखिन्छ । उनले क्षेप्यास्त्र ‘अमेरिकाको स्वतन्त्रता दिबसको उपहार’ भनेर टिप्पणी गरेको सरकारी टेलिभिजनले देखाएको छ ।
प्योङयाङको क्रियाकलप बिरुद्ध दक्षिण कोरिया र अमेरिकाले संयुक्त सैनिक अभ्यास गरेको छ । साथै संयुक्त राष्ट्रसंघको आपतकालिन बैठक पनि बसेको छ । बैठकमा खासै केही नभए पनि अमेरिकाले उत्तर कोरियालाई सैनिक कार्बही गर्न सक्ने आशय ब्यक्त गरेको छ ।
यही शुक्रबार देखि जर्मनीमा शक्तिशाली देशहरुको सम्मेलन जी—२० सुरु हुँदैछ । यसमा मुख्य बिषय उत्तर कोरिया हुने पक्का छ । यसले के निष्कर्ष निकाल्छ भनेर अनुमान गर्न अहिले नै हतारो हुनसक्छ । तर वार्ता मार्फत समस्या समाधान गर्ने सके सबै भन्दा राम्रो हुनेमा कसैको शंका छैन ।