कोरियाबाट बिद्यालयलाई सहयोग

सपोर्ट नेपाल फाउण्डेशन दक्षिण कोरियाबाट नेपालको एक विद्यालयलाई आर्थिक सहयोग प्रदान गरेको छ । काठमाडौं शहरको नजिक रहेर पनि भौतिक पूर्वाधारको अभावमा अति दयनीय अवस्थामा रहेको चन्द्रगिरी नगरपालिका ९ माता तिर्थस्थित श्री महालक्ष्मी निमाविलाई हालै दक्षिणमा रहेको प्रवासी नेपालीहरुको सामाजिक संस्था सर्पोट नेपाल फाउण्डेशनले एक लाख ५० हजार रुपैयाँ सहयोग प्रदान गरेको हो । सपोर्ट नेपाल फाउण्डेशनका संस्थापक सदस्य हरिकृष्ण श्रेष्ठले उक्त विद्यालयको भ्रमण गरेर विद्यालयको अवस्थाबारे बुझेका थिए ।  सहयोग रकम संकलन गरेर पठाइ सकेको र उक्त रकमबाट विद्यार्थीका लागि आवश्यक फर्निचर तथा कार्यालयमा चाहिने भौतिक सामाग्रीका लागि खर्च गरि सकेको संस्थापक सदस्य हरिकृष्ण  श्रेष्ठले जानकारी दिएका छन्  ।
विसं. २०४५ सालमा स्थापित विद्यालयमा १० जना शिक्षकसहित एकसय २५ जना विद्यार्थीहरु रहेका छन् । विद्यार्थीहरुका लागि आवश्यक बेन्च नभएकोले विद्यार्थीहरुले भुईमै बसेर पढ्ने गरेका थिए । त्यस्तै पुस्तकालय र अफिस कोठा समेत बेहाल रहेको थियो । ज्यामी काम गर्ने तथा अत्यन्त न्युनस्तरका परिवारका छोराछोरीले अध्ययन गर्दै आएको विद्यालयको अवस्था पनि अति नै नाजुक रहेकोले यहि विद्यालयलाई सहयोग गरेको हो ।
सपोर्ट नेपाल फाउण्डेशनले नेपालमा भूकम्प प्रभावित विभिन्न विद्यालयहरुको पुननिर्माण जस्ता कार्यदेखि थुप्रै सामाजिक कार्यमा सहयोग पुर्याउदै आएको छ ।