सोनाम ल्होछार बृहत साँस्कृतिक कार्यक्रमको समिक्षा एवं आयव्यय सार्वजनिक गरिने
नेपाल तामाङ घेदुङ दक्षिण कोरियाद्धारा आयोजित मञ्जुश्री संवत २८६० “डुक” मु पुखी ल्हो सोनाम ल्होछार बृहत साँस्कृतिक कार्यक्रम २०२४ को समिक्षा एवम आयव्यय सार्वजनिक गरिने भएको छ। अप्रील १४ आइतबारका दिन बिहान ११ बजे दोङ्देमून स्थित निक नेपाल ट्राभल्सको सभाहलमा आयोजना गरिने कार्यक्रममा सम्मान समारोह पनि रहने अध्यक्ष राजकुमार स्याङ्तानले जानकारी गराएका छन्।
नेपाल तामाङ घेदुङ दक्षिण कोरियाले “तामाङ भाषा, धर्म, कला, संस्कार, संस्कृतिको प्रवर्द्धन गरौं, आफ्नो पहिचान र अस्तित्वको लागि एक हौ” भन्ने मुल नाराका साथ कोरियन पर्व सलनालको अवसरमा गत फेब्रुअरी ९ तारिक शुक्रबारका दिन बृहत साँस्कृतिक कार्यक्रमको आयोजना गरेको थियो। सौल स्थित 컨벤션센터 사울특별시 종로구 자하문로 255(부암동 165-3),जोङ्गाक स्टेसन नजिक HW Convention Hall मा आपातकालीन राहत कोष सहयोगार्थ कार्यक्रम भव्यताका साथ सम्पन्न भएको थियो।
आफ्नो जातीय अस्तित्व र पहिचान संरक्षणमा संस्थाले उल्लेखनीय भूमिका खेल्दै आईरहेको सन्दर्भमा उक्त कार्यक्रमले मनोरञ्जनको सांगीतिक प्याकेज भइ आम दर्शक श्रोताको उत्कृष्ट कार्यक्रम भएको प्रतिकृया पाएको छ। समिक्षकहरुको सल्लाह र सुझाव सहितको समीक्षा संकलन गरि स्वच्छ र पारदर्शी रुपमा कार्यक्रमको आयव्यय विवरण प्रस्तुत गरिने साथै कार्यक्रम अवधिभर विभिन्न तवरले उल्लेख्य सहयोग गर्ने कलाकार तथा सहयोगीहरुलाई सम्मान गरिने संस्थाका महासचिव दावा फिन्जो योञ्जन तामाङले बताएका छन्।
उक्त कार्यक्रम लाई सभ्य र भव्य रुपमा सफल बनाउन कोरियास्थित सम्पूर्ण संघसंस्था, संस्थामा सम्बद्ध महानुभावहरु, आर्थिक नैतिक र भौतिक रुपमा सहयोग गर्ने सम्पूर्णमा आयोजकले उपस्थितिको लागि अनुरोध गरेको छ।
