किकबक्सिङ च्याम्पियन टुर्नामेन्टमा भाग लिन कोरिया आउदै नेपाली खेलाडी
जापानमा बसेर खेलक्षेत्रलाई अगाडि बढाउदै आएका किकबक्सिङका खेलाडी मोहन महर्जन दक्षिण कोरियामा हुनलागेको अन्तर्राष्ट्रिय स्तरको किकबक्सिङ च्याम्पियन टुर्नामेन्टमा सहभागि हुने भएका छन् । यहि १४ तारिख शनिबार साँझ कोरियाको इन्छनस्थित नाम्दोङ्ग जिम्नासियममा हुन गइरहेको ६८ केजी अन्तर्गतको उक्त खेलमा महर्जन कोरियाका K-1 वल्र्ड म्याक्स टुर्नामेन्ट खेलाडी लि सङह्योङसँग भिडने भएका छन् ।
सन् २००९ मा जापानमा आयोजित मार्शल आर्ट किकबक्सिङमा उत्कृष्ट भएका मोहन महर्जनले जापानमा भएको प्रोफेसनल २७ खेलमा भाग लिइसकेका छन् । जसमा अहिलेसम्म १२ वटा खेलमा जित हासिल गरिसकेका उनले कोरियामा हुन लागेको खेलमा पनि पूर्ण तयारीकासाथ सहभागिता जनाउने बताएका छन् । ‘विश्व च्याम्पियन भइसकेका कोरियाका चर्चित खेलाडि लि सङह्योङसँग खेल्न पाउनु नै ठुलो सौभाग्य हो । सँगै भिड्न पाउँदा नर्भस भन्दा नि अति नै खुशी लागेको छ’, फोनिज कोरियासँगको अनलाइन कुराकानीमा उनले भने । ‘खेलमा हारजित त भइहाल्छ नि तै पनि जतिसक्दो जितेर नेपालको झण्डा फहराउने प्रयास गर्नेछु । नेपाललाई विश्वसामु चिनाउने यो राम्रो अवसर पनि हो’, उनले भने ।
कोरियामा हुन लागेको खेलमा सहभागिता जनाउन उनी जापानबाट १३ तारिख नै कोरिया आउने छन् । दिनको तीनचार घण्टा अभ्यासमा जुटिरहेका महर्जन खेलको लागि पुरा तयारीमा रहेका छन् । जापानबाट सहभागि भएपनि नेपालको झण्डा फहराउने भएकोले कोरियामा रहेका सम्पूर्ण नेपाली, राजदूतावास तथा कोरियामा रहेका विभिन्न नेपाली संघसंस्थालाई कार्यक्रममा उपस्थिति जनाएर हौसला प्रदान गरिदिन पनि उनले आग्रह गरेका छन् ।
विगत १५ वर्षदेखि जापानमा बसेर मार्शलआर्ट खेलको माध्यमबाट नेपाललाई चिनाउदै आएका मोहन महर्जन ड्रयागन उपनामले समेत चिनिन्छन् । जापानमा नेपालकै पहिलो प्रोफेसनल खेलाडी महर्जन जापान बाहेक युरोपमा भएको अन्र्तराष्ट्रिय स्तरको ग्लोरी टुर्नामेन्टमा समेत सहभागिता जनाइसकेका छन् ।
ललितपुर सुनाकोटीका महर्जन नेपालमा हुँदा पनि कँरातेका राम्रा खेलाडी थिए । सन् २०००मा काठमाडौंस्थित जापानीज दूतावासमा जापानीज भाषा सिकेर परिक्षामा उत्कृष्ट भएपछि नेपाल र जापानको साँस्कृतिक आदानप्रदान गर्ने कार्यक्रम अन्तर्गत पहिलो पटक जापान जाने अवसर मिल्यो । पछि जापान आउने जाने क्रममा जापानको राजधानी टोकियोमा नै विवाह गरेर बसेका महर्जनले एकदिन जापानमा भएको K-1 अन्तर्राष्ट्रिय किकबक्सिङ टेलिभिजनमा हेर्दै थिए । नेपालको सहभागिता नदेखेपछि उनलाई किकबक्सिङ खेल्ने जोश चल्यो । त्यसपछि उनले २००६ मा किकबक्सिङको प्रशिक्षण लिए । २००७ मा प्रोफेसनल किकबक्सिङको लाइसेन्स लिएपछि उक्त खेललाई निरन्तरता दिन थाले ।
विदेशमा बसेपनि नेपाली हुनुमा गौरव गर्ने महर्जन भन्छन्, ‘म जापानमा हुने हरेक टुर्नामेन्टहरुमा नेपालको झण्डालाई फहराउदै नेपाल र नेपालीको शिरलाई उच्च पार्ने काम गर्दै आएको छु ।’ शरीरले साथ दिएसम्म खेलजतमै लागिराख्ने महर्जनले खेलको माध्यमबाट नेपाललाई विश्वमा चिनाउने लक्ष्य लिएका छन् । भन्छन्, ‘म यहाँसम्म आइपुग्नुमा मेरो मेहेनत र परिश्रमसँगै जापानमा रहेका नेपालीहरुको साथ र हौसला पनि हो ।’
