कोरियामा रेशम फिलिलि
फोनिज कोरिया सम्वाददाता
दक्षिण कोरिया, पछिल्लो समय दक्षिण कोरियाका विभिन्न शहरहरुमा नेपाली चलचित्र प्रदर्शन गर्ने लहर नै चलेको छ । जसले गर्दा प्रवासमा रहेका नेपालीहरुले पनि नेपाली चलचित्र हेरेर मनोरञ्जन लिइरहेका छन् । यसै क्रममा ओखलढुंगा सेवा समाज दक्षिण कोरियाले कोरियाको विभिन्न शहरहरुमा नेपाली कथानक चलचित्र रेशम फिलिलि प्रदर्शन गर्ने भएको छ ।
नेपाली भाषा, कला, साहित्य र संस्कृतिको प्रवद्र्धन गर्ने उद्देश्यले ओखलढुंगा सेवा समाज दक्षिण कोरियाले थेगु शहरको सगु मुन्ह्वा हेग्वान थेगुमा मे महिनाको ३ तारिख आइतबार दिनको १ बजे पहिलो प्रर्दशन गर्ने भएको छ । चलचित्र हेर्नको लागि १५ हजार कोरियन वन टिकट दर राखिएको छ । दिनरात काम गरेर थाकेको तन र मनलाई हाँस्य प्रधान चलचित्र रेशम फिलिलिले फ्रेस बनाउने आशा आयोजकले लिएको छ । चलचित्र प्रदर्शन पछि अन्नपूर्ण सेवा समाजले आपतकालिन राहतकोष स्थापनार्थ संचालन गरिरहेको चिठ्ठा पनि खोलिने भएको छ ।
अप्रिल २४ अर्थात् बैशाख ११ गते नेपालमा पहिलो पटक प्रदर्शन हुन लागेको चलचित्रको पिरतीको छाता ओढाउन, तिमी र म घुम्न जाउन बोलको गीतले अत्यधिक चर्चा पाएको छ ।
असहाय, गरिवि र पिछडिएका वर्गको उठानका साथै उनीहरुलाई आयमूलक काम दिलाउने, गरिव तथा जेहेन्दार बालबालिकाहरुको शिक्षामा सहयोग पुर्याउने एवं ओखलढुंगा जिल्लाको लागि एम्बुलेन्स र गुम्बा निर्माण जस्ता सामाजिक कार्यका लागि सहयोग गर्ने लक्ष्यसहित कोरियामा केही समय अघिमात्र स्थापित ओखलढुंगा सेवा समाजले कोरियामा रहेका नेपालीहरुलाई मनोरञ्जन प्रदान गर्नुका साथै आर्थिक रकम संकलन गर्नको लागि पनि पहिलो पटक नेपाली चलचित्र प्रर्दशन गर्न लागेको ओखलढुंगा सेवा समाज, दक्षिण कोरियाका अध्यक्ष मानसिंह गुरुङ बताउँछन् ।
चारसय ६० जना अटन सक्ने सिट क्षमता भएको थेगुको हलमा दर्शकको उल्लेख्य सहभागिता रहने आशा गर्दै अध्यक्ष गुरुङले विभिन्न संघसंस्था एवं कोरियामा रहनु भएका नेपाली दाजुभाइ दिदीबहिनी सबैलाई चलचित्र हेरिदिनको लागि आग्रह समेत गरेका छन् । उनका अनुसार उक्त चलचित्र मे महिनाको २४ तारिख जेजुदोमा प्रर्दशन गरिने भएको छ । त्यसैगरी सउल, आनसान, ख्वाङजु, देजन, किम्हेलगायतका विभिन्न शहरहरुमा समेत प्रदर्शन गरिने भएको छ ।
प्रणव जोशीको लेखन तथा निर्देशन र माधव वाग्लेको निर्माणमा बनेको हाँस्यप्रधान चलचित्र रेशम फिलिलिमा विनय श्रेष्ठ, मेनुका प्रधान, कामेश्वर चौरासियाको मुख्य अभिनय रहेको छ ।
