म्याच फिक्सिङको आरोपमा पक्राउ परेका खेलाडीलाई १७ दिन थुनामा राख्न अनुमति
काठमाडौं – म्याच फिक्सिङको आरोप लागेका ५ खेलाडीलाई १७ दिन थुनामा राखेर अनुसन्धान गर्न विशेष अदालतले अनुमति दिएको छ । अदालतले पक्राउ परेको मितिले १७ दिन थुनामा राख्न भनेकाले प्रहरीले उनीहरुलाई कात्तिक १३ गतेसम्म थुनामा राख्न पाउँछ ।
असोज २७ गते पक्राउ परेका राष्ट्रिय फुटबल टिमका कप्तान सागर थापा, अन्जान केसी, सन्दीप राई, रितेश थापा र विकास सिंह क्षेत्रीविरुद्ध विरुद्ध प्रहरीले विशेष अदालतमा राज्यविरुद्धको मुद्दा दर्ता गरेको थियो ।
दसैं विदाका कारण अदालत बन्द भएकाले म्याद थपका लागि उनीहरुलाई मंगलबार विशेष अदालतमा उपस्थित गराइएको थियो । अदालतले उनीहरुलाई १७ दिनसम्म थुनामा राखेर अनुसन्धान गर्न आदेश दिएको हो ।
पहिलो पल्ट म्याच फिक्सिङको मुद्दा परेको र त्यसबारेमा स्पष्ट कानुन नभएकाले प्रहरीले उनीहरुमाथि राज्यविरुद्धको मुद्दा लगाएको हो । राज्यविरुद्धको अपराध ऐन २०४६ अन्तर्गतका मुद्दाहरु विशेष अदालतले हेर्ने भएकाले उनीहरुलाई विशेष अदालतमा लगिएको हो ।
अदालतमा उपस्थित हुने क्रममा कप्तान थापाले आफूहरु निर्दोष रहेको दावी गर्दै सञ्चार माध्यमले पनि अपराधिकै रुपमा व्यवहार गरेको आरोप लगाए । अर्का खेलाडी सन्दिप राईले आफूहरु अहिले छानविनका क्रममा रहेको र सबै छानविन सकिएपछि मात्र बोल्ने बताए ।
म्याच फिक्सिङ गरेको स्वीकार गरेको हो भन्ने पत्रकारको प्रश्नमा उनीहरुले एक स्वरले हैन भनेका थिए । प्रहरीले भने उनीहरुले म्याच फिक्सिङ गरेको स्वीकार गरेका दावी गरेको छ ।
