सन् २०२३ मा न्युनतम तलब २० लाख वन हुने

दक्षिण कोरियाले सन् २०२३ का लागि कामदारकोे ज्याला वृद्धि गर्ने भएको छ । बुधबार अबेरसम्म बसेको ज्याला निर्धारण समितिले अहिलेको ज्यालामा ५ प्रतिशत बढाएर प्रतिघण्टा ९ हजार ६ सय २० वन बनाएको हो ।
मासिक रुपमा कामदारको न्युनतम तलब २० लाख १० हजार वन प्राप्त गर्ने छन् । ओभर टाइम र सार्वजानिक विदाको समयमा काम गर्दा अतिरिक्त भत्ता पाउनेछन् । यो नियम कोरियाका सम्पूर्ण उद्योगहरुमा लागु हुनेछ ।
ज्याला निर्धारण समितिले गरेको यो निर्णय गर्दा उद्योगी पक्षले उच्च ब्याजदर, कोरियाली वनको डलरसँगको उच्च गिरावट र कोरोना महामारीका कारण भएको आर्थिक क्षतिलाई कम गर्न कामदारको तलव बढाउन नहुने जनाएका थिए । त्यस्तै मजदुर युनियन पक्षले भने यस अघिका राष्ट्रपतिको कार्यकालमै प्रतिघन्टा १० हजार वन पु¥याउने घोषणालाई कार्यान्वयन गर्न माग गरेका थिए । ज्याला निर्धारण समितिमा मजदुर युनियन, उद्योगी र सार्वजनिक क्षेत्रका ९÷९ जना सदस्य रहेका रहने व्यवस्था छ ।
प्रस्तावको निर्णय हुन पहिले नै सार्वजनिक क्षेत्रका ९ सदस्य र कोरियाली मजदुर युनियनका ४ जना प्रतिनिधिले आफूहरुले भने जस्तो तलब नबढाएको विरोधमा बैठक छाडेका थिए । बाँकी सदस्यहरुले भने निर्णयको पक्षमा मतदान गरेका थिए ।
समितिले गरेको ज्याला निर्धारण कोरियाली श्रम तथा रोजगार मन्त्रालयले आगामी अगस्ट ५ मा अनुमोदन गरेर अर्को बर्षको जनवरी १ देखि लागु गर्नेछ । ज्याला निर्धारण समितिले ८ बर्षमा पहिलो पटक समयमै अर्को बर्षका लागि ज्याला निर्धारण गरेको हो ।
यस अघिका राष्ट्रपति मुन जे–इनको कार्यकालमा सन् २०१८ मा १६.४ प्रतिशत, २०१९ मा १०.९ प्रतिशत, २०२० मा २.९ प्रतिशत ज्याला बढाएको थियो । त्यस्तै सन् २०२१ मा १.५ प्रतिशत तलब बढेको थियो । यो अहिलेसम्मकै सबै भन्दा कम बढेको तलब हो ।
तलब बृद्धिले रोजगार अनुमति प्रणाली इपिएस मार्फत कोरिया आएका ३५ हजार भन्दा बढि नेपाली कामदार लाभान्वित हुनेछन् ।