कोरियामा अध्ययनरत बिरामी गोबिन्द अर्यालले पाए स्याङ्जा परिवारबाट आर्थिक सहयोग ।
बोम्जन गुरुङ
०३ सेप्टेम्बर २०२१, सउल कोरिया ।
स्याङ्जा जिल्लाको गल्याङ् नगरपालिका वडा नं. ०८ चिउरी स्थायी घर भई अध्ययनको सिलसिलामा कोरिया आएका गोविन्द अर्यालको स्वास्थ्यमा जटिल समस्या देखिएपछि स्याङ्जा परिवारको पहलमा संकलित ६६,४६,५५५/-कोरियन वोन (करिब पौने सात लाख नेपाली रुपैंया) बिरामीलाई हस्तान्तरण गरिएको छ । अर्यालको कलेजो, मुटु र मष्तिष्कमा एकैचोटी समस्या देखिएपछि सउल स्थितको एक अस्पतालमा विगत एक महिनादेखि उपचाररत थिए ।
अर्याल अचानक बेहोस भए लगत्तै Seoul Hospital को आकस्मिक कक्षमा उनलाई भर्ना गरिएको थियो । जटिल स्वास्थ्य समस्याका कारण उनको उपचार धेरै खर्च महङ्गो भएकोले स्याङ्जा परिवार दक्षिण कोरियाले आर्थिक सहयोगको अपिल गर्दै विज्ञप्ति सार्वजनिक गरेको थियो । संस्थागत पहलमा संकलित रकम सहित गत हप्ता स्याङ्जा परिवार दक्षिण कोरियाका केन्द्रीय अध्यक्ष विजय थापा, केन्द्रीय उपाध्यक्ष भक्त थापा, बिरामी निकट दुर्गा भण्डारी लगायत अन्य व्यक्तित्वहरु बिरामीलाई भेटेर नै उक्त रकम हस्तान्तरण गरिएको हो ।
पछिल्लो समय स्वास्थ्यमा क्रमिक सुधार देखिएका अर्याल अस्पताल डिस्चार्जपछि हाल नियमित औषधी सेवन गरिरहेका छन् यद्धपि समय समयमा नियमित चेक जाँच गरिरहनुपर्ने अस्पताल श्रोतले जनाएको छ । बिरामीको स्वास्थ्य लाभको कामना गर्दै मानविय संवेदना सहित सहयोगमा जुट्नुहुने सबै मनकारी व्यक्ति र संस्थाप्रति स्याङ्जा परिवार दक्षिण कोरियाका केन्द्रीय अध्यक्ष विजय थापाले हार्दिक आभार प्रकट गरेका छन् ।
सहयोगीहरुको विवरण संस्थाको पेजमा सुरक्षित रहेको केन्द्रीय सचिव माधव अर्यालले बताए । बिरामीको घर परिवारबाट आर्थिक सहयोगको अपेक्षा अनुसार यो दुःखको बेलामा संस्थागत अपिल र अभियानलाई सफल बनाउन सहयोग गर्नुहुने तमाम मनकारी व्यक्तित्वहरुलाई स्याङ्जा परिवार दक्षिण कोरियाले धन्यवाद व्यक्त गरेको छ ।
