नेपाल आदिवासी जनजाति महिला महासंघ अमेरिकाद्धारा आयोजित देउसी भैलो कार्यक्रम सम्पन्न
नेपाल आदिवासी जनजाति महिला महासंघ अमेरिका फिओनाले तिहारको अवसरमा देउसी भैलो कार्यकम आयोजना गरयो । न्यू योर्कको ज्याक्सन हाइटमा भएको कार्यक्रमको उदघाटन, नेपाल आदिवासी जनजाति महासंघ अमेरिकाका उपाध्यक्ष विनोद पोमोले दिप प्रज्वलन गरेर गर्नुभएको थियो । पोमाले महिला महासंघ स्थापना कालदेखि नै महासंघलाई सहयोग गर्दै आउनुभएको छ ।
महासंघका उपाध्यक्ष इन्दिरा चोङवाङले उपस्थित सबैलाई औपचारिक स्वागत गर्दै फिओनाको उद्देश्यको बारेमा जानकारी दिनुभयो । विभिन्न क्षेत्रमा रहेर पनि आदिवासी महिलाहरुको लागि सहयोग गर्नका लागि स्थापित महासंघले हामी सगै केही फरक गर्छौ भन्ने मान्यताका साथ नेपाल आदिवासी महिलाको शशक्तिकरण र सहयोगका लागि काम गर्दै आएको छ । नेपालको लागि काम गर्दै आउनुभएकी सँगसगै संस्थाका अध्यक्ष नताशा ओज्नियाकले, अमेरिकामा रहेर पनि आदिवासी महिलाहरु एउटै मञ्चमा पाएको भन्दै उनीहरुको एकताको प्रशंशा गर्नुभयो ।
महासंघले बार्षिक रुपमा गर्दै आएको देउसी भैलो कार्यकममार्फत आदिवासी जनजाति दिदी बहिनीहरु भेला भएर आफनो संस्कृति जगेर्नाका लागि योगदान गर्दै आएको छ । कार्यक्रममा उनीहरुले विभिन्न संस्कृति झल्कने गीत गाएर र नृत्य गरेर, आफनो मातृभूमीप्रति सम्मान व्यक्त गरेका थिए ।
यसैबीच, कार्यक्रममा, महिला महासंघका सल्लाहकार पूर्व डिआइजी पार्वती थापा मगर र नृत्य निर्देशकहरु संगीता मुखिया छोचुन, र विजय नकर्मी र हेभन्ली पाथका अध्यक्ष सुकु राईलाई उहाँहरुको सहयोगको कदर गर्दै सम्मान गरिएको थियो । सचिव बन्दना राइले तिहार, दिपावली र बलिहाङ र छठ पर्वको शुभकामना दिदै भैली कार्यक्रम सञ्चालन गर्नुभएको थियो ।
अध्यक्ष संगीनी रानाले कार्यक्रममा उपस्थित सबै सहभागी महिलाहरुलाई आफनो पहिचान र अस्तित्वका लागि जिम्मेवार हुन आव्हान गर्दै कार्यक्रमको समापन गर्नुभएको थियो । महिला महासंघले देउसी भैलो कार्यक्रम मार्फत एक हजार एक सय अठार डलर आर्थिक संकलन गरेको छ । कार्यक्रममा, युवा, वृद्ध लगायत महिला दिदी बहिनीहरु सहभागी थिए ।
