एशियाका ६ ओटा राष्ट्रको प्रतिस्प्रधीलाई पछि पार्दै नेपाल अग्रस्थानमा
![](https://www.fonijkorea.net/wp-content/uploads/2017/10/nn-676x450.jpg)
सउल, ई.पि.एस.मार्फत दक्षिण कोरियामा कार्यरत एक नेपाली नागरिकले एशियाका ६ ओटा राष्ट्रको प्रतिस्प्रधीलाई पछि पार्दै अग्रस्थान हासिल गरेको छ । (कोरियन बुद्धिष्ट एसोसियशन झोगे जुड०) कोरियन बौद्ध धर्म केन्द्रीय बिदेशी बिभागको आयोजनामा गत अक्टोबर १५ तारिख आइतबारका दिन झोगेसा हलमा सम्पन्न भएको ‘खुल्ला प्रथम बिदेशी कामदार कोरियन भाषा वाक्तृत्व कला प्रतियोगीता’मा प्रथम स्थानको लागि नेपाल छनौट भएको हो ।
प्रतियोगितामा हाल कोरियामा कार्यरत काठमाण्डौ आरुबारी निबासी निमा कुमार घिसिंग तामाङको आफ्नो कोरिया प्रवेशको सुरुवाती दिन, कोरिया बसाई, भोगाईको अनुभब, चुनौती र त्यसको सामनाको बारेमा राख्नु भएको सन्देशमुलक प्रस्तुति निर्णायक मण्डलबाट उत्कृष्ट ठहरिदै प्रथम स्थानको लागि छनोट हुनु भएको थियो ।
प्रतियोगितामा प्रथम भएका निमाले नगद पुरुस्कार तथा प्रमाणपत्र प्राप्त गर्नु भएको थियो । जोगेसा स्थित कोरियन गुम्बामा अयोजित एसियाका सात राष्ट्रबाट १३ जना प्रतिस्पर्धी सहभागी रहेको उक्त प्रतियोगितामा “सउल नेपाल गुम्बा” र “नेपाल बौद्ध परिवार” दक्षिण कोरियाको अगुवाईमा नेपालको प्रतिनिधित्व गर्दै बिजेता घिसिंङ् निमा कुमार तामाङ र नुवाकोट निवासी कान्छा बाबु ह्योल्मोले सहभागी जनाएका थिए ।
उक्त अबसरमा नेपालको तर्फबाट सहभागिताको नेतृत्व गर्दै सहभागी जनाई दिनु भएकोमा “नेपाल बौद्ध परिवार” दक्षिण कोरियाका अध्यक्ष श्री पेम्बा दोङ्बा ह्योल्मो ज्युले सम्मान पत्र प्राप्त गर्नु भएको थियो l हुटिंग गर्ने समूह लाई पनि पुरुस्कार दिने आयोजकको निर्णय अनुसार नेपाली समूह उत्कृष्ट हुटिंगको पुरुस्कार द्वारा पुरुस्कृत भएको थियो ।
सो अबसरमा सोल नेपाल गुम्बाका प्रमुख लामा कुन्साङ दोर्जे लामाद्वारा बिजेता निमा र सहभागी जनाउने कान्छा बाबु ह्योल्मोलाई खादा लगाई बधाई दिदै आगामी दिनहरुमा पनि नेपालीहरुबाट यस्तै खालका प्रतियोगितामा सहभागी भई नेपाल र नेपालीको गौरब बढाउने कार्यमा सहभागी भईदिनु हुन आग्रह गर्दै रात्रिभोजको आयोजना गर्नु भएको थियो ।
निमा घिसिंङ्ले प्राप्त गर्नु भएको यो उपलब्धिलाई कोरियनहरुको नजरमा हामी नेपालीहरुको मेहनती लगनशीलता तथा कोरियन भाषा प्रतिको मोहको छविलाई अझ गाढा बन्न सहयोग गर्दै आगामी दिनहरुमा रोजगारीको लागि कोरिया आउन चाहने युवाहरुको लागि सकारात्मक पाटोको रुपमा लिन सकिन्छ ।