कोरियामा कम्पनीका साहुसँगै नेपाली कामदारले दशैं मनाए
सोल,
नेपालीहरुको गैर आवाशीय बसाई संगै नेपाली सस्कृति र परम्परा अन्तराष्ट्रियकरण बन्न पुगेको छ । हिन्दु सस्कृतिलाई गैर हिन्दुहरुले पनि अनुसरण गर्न शुरु गरेका छन । गत साता दक्षिण कोरियामा कम्पनी साहु र नेपाली कामदारहरुले मनाएको दशैँ पर्वले उक्त बिषयलाई पुष्टि गरेको छ ।
गत साता नेपाली दूतावासले विजय दशमीको दिन टीका ग्रहण तथा शुभकामना आदानप्रदान कार्यक्रम गर्यो । एनआरएनको समन्वयमा विभिन्न सस्थाले अष्टमीमा टीका लगाउने कार्यक्रम राखे । सँगै किम्हे र फेन्थेक माइग्रेन्ट सेन्टरले पनि अष्टमीकै दिन टीका ग्रहण कार्यक्रम राखेका थिए । तर, यसरी आयोजना भएका कार्यक्रमले भन्दा अर्को कार्यक्रमले नेपाली कामदारलाई धेरै प्रभाव पार्यो । तीन नेपाली कार्यरत एक कम्पनीका साहुले नेपाली कामदारसँगै दसैं मनाएको भन्ने खबरले देश विदेशमा चर्चा पाएको छ । साहुले टीका लगाइदिएको भिडियो समेत सार्वजनिक भएको छ ।
भिडियोमा कम्पनी साहुले नेपाली कामदारलाई टीका लगाइदिएर आर्शीवाद पनि दिएका छन् । दसैंको शुभसाइत पारेर साहुले टीका लगाइदिएको कम्पनीमा कार्यरत काठमाडौँ फुटुंगका यदुकुमार गिरिले जानकारी दिए । सुयोछन् नजिक योन्छन्मा फुछु (कोरियन खानाको परिकार) उत्पादन गरिने कम्पनीमा कार्यरत नेपालीलाई खुसीसाथ दसैं मनाउने अवसर मिलाइदिएको हो । कम्पनी साहुले नेपालीको कामको प्रशंसा गर्दै आर्शीवाद दिए । साथै साहुले स्वास्थ्यको ख्याल गर्न समेत नेपालीलाई सुझाव दिएका छन् ।
एक पुरुष र दुई महिला कार्यरत नेपाली कार्यरत कम्पनी संचालकले दक्षिणा स्वरूप जनही ५०/५० हजार वन दक्षिणा पनि दिए । कोरियनले पनि मनाएको दसैंको भिडियो अहिले सामाजिक संजालमा ब्यापक हेरिएको छ । उक्त भिडियो फेसबुकका विभिन्न पेजमा गरि पाँच लाख बढीले हेरेका थिए यस्तै छुन्ग्फेंगमा कार्यरत तिन नेपाली रहेको एक कृषि फर्मका कम्पनी साहुका परिवारले दशैं बिशेष तरिकाले नेपालीसंगै मनाए । कोजाग्रत पुर्णिमाको दिन मनाइएको दशैँ कार्यक्रममा नेपाली र कोरियनहरुले एक आपसमा टिका लगाई आशिर्वाद पनि थापे । दुइ पुरुष र एक महिला कार्यरत सो फर्ममा पारिवारिक वातावरण रहेको पर्वतका प्रकाश काफ्लेले बताए ।
लगनशील भएर कार्य गर्दा कम्पनी साहु आफुहरुबाट प्रभावित भएको उनले बताए । काफ्लेका अनुसार नेपाली पर्वहरु उनीहरुले नेपालमा जस्तै गरि मनाउदै आइरहेका छन । कोरियन नागरिकहरुले पनि लगाएको दशैँ टिका र जमराको भिडियो फेसबुकमा हेर्नेहरुको संग्ख्या बढिरहेको छ ।
