हङकङमा राष्ट्रिय मेलमिलाप दिवस तथा नयाँ बर्षको शुभकामना आदानप्रदान

हङकङ, नेपालको सबैभन्दा ठूलो र पुरानो प्रजातान्त्रिक पार्टी कांग्रेसको जननेता वीपी कोइरालाको मेलमिलाप र एकताको नीतिको सम्झना गर्दै नेपाली जनसम्पर्क समिति हङकङको आयोजनामा हङकङ स्थित नेपाली महाबाणिज्यदूत श्री कमलप्रसाद भट्टराईज्यूको प्रमुख आथित्यमा राष्ट्रिय मेलमिलाप दिवस सम्पन्न भएको छ । नेपाली काँग्रेसको बैदेशिक सम्पर्क संस्थाकोरुपमा हङकङमा स्थापना गरिएको नेजस हङकङले उक्त अवसरमा हङकङमा रहेका नेपालका राजनैतिक दलहरूका सम्पर्क संस्था नेकपा (माओवादी केन्द्र) हङकङ, प्रवासी नेपाली एकता समाज हङकङ (राप्रपा), समाबेसी नेपाली समाज हङकङ (संघीय समाजवादी फोरम), प्रवासी नेपाली मञ्च हङकङ (एमाले), नेपाल आदिवासी जनजाती महासंघ, एचकेएनएफ, हिन्स, नेपाल चेम्बर अफ कमर्श हङकङ, एनआरएन हङकङ लगायत अन्य सामाजिक जातिय तथा क्षेत्रीय संघसंस्थाहरूलाई आमन्त्रित गरिएको थियो ।
कार्यक्रमलाई सम्बोधन गर्दै प्रमुख अथिति महाबाणिज्यदूत श्री भट्टराईले मेललिमाप अपरिहार्य रहेको भन्दै यस सद्धभाव समाजको हरेक तह तप्कामा हुनु जरूरी छ भन्नुभयो । उहाँले नेपालको संविधानको धारा २९१ मा प्रवासी नेपालीहरूको अधिकारलाई कुण्ठित गरेको भन्दै हङकङमा रहेका राजनैतिक दलका सम्पर्क संस्थाहरूले ऐक्यबद्धता गर्दै नेपाल सरकारलाई प्रेषित गरेको पत्र पनि मेलमिलापको राम्रो उदारहण भएको भन्दै उक्त पत्र १० मिनेटको अन्तरालमा नेपाल सरकारको सम्बन्धित स्थानमा पठाईसकेको जानकारी गराउनु भयो । यस कार्यक्रममा आमन्त्रित अथितिहरूको तर्फबाट नेकपा (माओवादी केन्द्र) हङकङ अध्यक्ष श्री रबिन लिङ्देनले स्व. बिपी कोईरालाले ल्याउनु भएको यो मेलमिलापको निति हालको अवश्थामा अझै महत्वपूर्ण रहेको र आफू पनि यस नितिबाट प्रभावित रहेको भन्दै नेकपा माओवादीले पनि राष्ट्रिय हितको लागि यहि नितिमा रहेको मात्र सिद्धान्तको केहि फरक रहेको बताउनु भयो । प्रवासी नेपाली एकता समाज हङकङ (राप्रपा) का संयोजक श्री ईश्वर बिक्रम शाहले नेजस हङकङको यस कार्यक्रम स्वागतयोग्य रहेको भन्दै कार्यक्रम सफलता र अंग्रेजी नयाँ वर्षको उपलक्ष्यमा आफ्नो पार्टीको तर्फबाट शुभ कामना व्यक्त गर्नु भयो । यस्तै नेपाल चेम्बर अफ कमर्श हङखङका अध्यक्ष श्री डासुराम पराजुली, एनआरएन हङकङका अध्यक्ष श्री ललित लिम्बुले पनि कार्यक्रम सफलताको कामना गर्द भर्खरै गठित नेजस हङकङको नवौं कार्यसमितिको कार्य सफलताको लागि शुभ-कामना व्यक्त गर्नुभयो ।
नेजस हङकङका महामन्त्री गोबिन रानाद्वारा सञ्चालित कार्यक्रममा उपसभापति मिनबहादुर गुरूङले स्वागत मन्तव्य राख्नुभएको थियो भने संस्थाका नेपाल स्थित नेपाली काँग्रेसको महासमितिका लागि चुनिएका महासमिति सदस्य-त्रय बसन्त श्रीनेत, राम गुरुङ र काजीकुमार गुरुङले मेलमिलापको उपादेयताबारे प्रस्टाउँदै आ-आफ्नो मन्तव्य राख्नु भएको थियो ।
दिवा भोज सहित सम्पन्न कार्यक्रमको समापन गर्दै नेजस हङकङका सभापति श्री जगत शाहले हङकङमा व्याप्त जातीय, क्षेत्रीय धारणाहरूको बाबजूद पनि आफू सदृरपश्चिमको व्यक्ति नेजस हङकङको सभापतिमा चुनिनु नै हामी भित्रको मेलमिलापको ज्वलन्त उदारहण रहेको बताउँदै भविष्यमा यहि मेलमिलापलाई अझै गहन र दरिलो बनाउँदै प्रजातान्त्रिक मूल्यमान्यतालाई अझै प्रगाढ बनाउने आफ्नो कोशिस रहने बताउनु भयो ।
कार्यक्रमको अन्तमा नवौं अधिवेशनबाट बिदा पाएका निवर्तमान कार्य समितिलाई संस्थालाई आजको दिनसम्म ल्याई पुराउन गरेको अथक मेहनत र योगदान स्वरूप खादा ओढाएर कदर पत्र प्रदान गरिएको थियो भने नवौं अधिवेशनका निर्वाचन मण्डल संयोजक दुर्गा गुरुङले छुट्टिएका पदाधिकारी तथा नयाँ सदस्यहरूलाई तथा गोपनियताको सपथ दिलाएका थिए । यस अवसरमा पुरानो कार्य समितिले नयाँ कार्य समितिलाई संस्थाको कागजपत्र हस्तान्तरण पनि गरेको थियो । स्मरण रहोस नेजस हङकङको नवौं अधिवेशन गत डिसेम्बरको २५ तारिख नेपाल काँग्रेशका केन्द्रिय सदस्य तथा भूपू मन्त्री श्री गोपालमान श्रेष्ठज्यूको प्रमुख आथित्यमा ईण्डिया क्लबमा सम्पन्न भएको थियो ।