कोरियामा विभिन्न कार्यक्रमका साथ तीज सम्पन्न
फोनिज कोरिया सम्वाददाता
दक्षिण कोरिया, नेपाली दिदीबहिनीहरुले हरेक वर्ष मनाउदै आएको हरितालिका तीज यसपाली पनि विभिन्न कार्यक्रमका साथ सम्पन्न भएको छ । विशेषगरी हिन्दू नारीहरुहरुको महान पर्व तीज कोरियामा रहेका नेपाली दिदीबहिनीहरुले एकहप्तादेखि दर खाने कार्यक्रमको आयोजना गर्दै मनाएका हुन् । यसपालीको तीज भदौ १९ गते अर्थात सेक्टेम्बर ४ तारिख आइतबारका दिन परेकोले विदेशमा हुने नेपालीहरुले तीजकै दिन विभिन्न कार्यक्रमको आयोजना गरेका थिए ।
कोरियामा तीज मनाउने कार्यक्रम अन्तर्गत थेगु शहरमा लोकगायिका सुनिता दुलालले आफ्ना तीज गीतहरु गाएर उपस्थित दर्शकलाई भरपुर मनोरञ्जन प्रदान गरिन् । थेगुबासी नेपालीहरुको सामाजिक संस्था अन्नपूर्ण सेवा समाजले आइतबार आयोजना गरेको रमाइलो तीज कार्यक्रममा अहिलेकी चर्चित लोकगायिका दुलालसँगै स्थानीय कलाकारहरुले तीज गीत गाएर तथा नृत्य प्रस्तुत गरेर कार्यक्रममा उपस्थित दर्शकलाई समेत नचाएका थिए ।
कार्यक्रमको पहिलो चरणमा प्रमुख अतिथि बनेकी नेपाली साहित्य समाज दक्षिण कोरियाकी अध्यक्ष कल्पना धरती (राई) ले नेपाली नारीहरुको चाड तीजमा प्रवासमा रहेका नेपाली दिदीबहिनीहरुले आफ्नो पिडालाई भुलेर मनोरञ्जन मात्र नलिइ एकअर्कामा सदभाव बाँडदै सिर्जनसिल कार्यमा समेत सक्रिय हुनुपर्नेमा जोड दिइन् । प्रवासी भूमिमा आफ्नो परम्परा रितिरिवाज, धर्म, संस्कृति, संस्कार, भाषा र भेषभूषाको संरक्षण र सम्वद्र्धन गर्ने उदेश्यले हरेक वर्ष तीज कार्यक्रमको आयोजना गर्दै आएको अन्नपूर्ण सेवा समाजका अध्यक्ष नगेन्द्र मगर, नेपाली चेली समाज दक्षिण कोरियाकी उपाध्यक्ष खिमा घलेलगायतले तीजको शुभकामना व्यक्त गरेका थिए ।
कार्यक्रममा सानु गुरुङ्, माया गुरुङ्, सवि गुरुङ्, सविना गुरुङ्, बुद्ध गुरुङ्, सपना गुरुङ्, मोहन थापा, गणेश राई, आङ्दोर्जे शेर्पालगायतका स्थानीय कलाकाहरुले गीत तथा नृत्य प्रस्तुत गरेका थिए भने कार्यक्रमको मुख्य आकर्षणको रुपमा रहेकी लोकगायिका सुनिता दुलालले यसपाली नि खाने दर बोलको गीतसहित चर्चित तीज गीतहरु गाएकी थिइन् ।
त्यसैगरी राजधानी सोलको दोङदेमूनस्थित नेपाल हाउसमा वुमन फर वुमनले सउलमा सम्पूर्ण प्रवासी महिला एक होऔं भन्ने नाराका साथ हरितालिका तीज कार्यक्रमको आयोजना गरेको थियो । नेपाली चेलीको सौभाग्यको प्रतिक मानिएको चुरा पोते रोतो साडीमा सजिएर उपस्थित भएका नेपाली दिदीबहिनीहरुले एकअर्कामा शुभकामना आदानप्रदान गर्दै दर खादै तीज गीतमा नाचगान गरेर मनाए । त्यस्तै गुल्मी सम्पर्क समिति कोरियाले नेपाली चेली जमघट र एक दिन भएपनि परदेशी भुमिमा मनोरञ्जन प्राप्त गरुन् भन्ने उद्धेश्यले राजधानी सोल देखि एक सय किलोमिटर टाढाको शहर सुवनमा दर खाने तथा तीज कार्यक्रमको चाजोपाजो मिलाएको थियो ।
यसको अलवा जेजु नेपाल कम्युनिटिले पनि तीज विशेष साँस्कृतिक कार्यक्रमको आयोजना गरेर जेजुबासी नेपाली दिदीबहिनीहरुलाई भेला गराइ मनोरञ्जन प्रदान गरेको थियो । त्यसैगरी एनआरएन बुसानले पनि आइतबार तीज विशेष कार्यक्रमको आयोजना गरेको थियो । धार्मिक र सास्कृतिक महत्व बोकेको यस चाड मनाउने क्रमलाई निरन्तरता दिदै नेपाली दिदी बहिनीहरुलाइ भरपुर मनोरन्जन दिने उदेश्यले आयोजना गरिएको हो । तीजमा भगवान शिवको आराधना गरिनुका साथै गीत र नाचगान गरेर मनोरञ्जन लिने गरिने भएपनि कोरियामा कार्यरत नेपाली महिलाले नाचगान गरेर मात्र तीज मनाउने गरेका छन् ।
