डोल्माको इहलीला यसरि समाप्त भयो
बुधबार बिहानै अस्पतालको शैयाबाट चिकित्सकले घोषणा गरे, ‘डोल्मा अब यो संसारमा रहिनन् । हामीले उनलाई बचाउन सकेनौं ।’ हो, तिनै डोल्मा शेर्पा अब कहिल्यै नर्फकिने गरी प्रवासी भूमिमा बिलिन भइन् । केबल सम्झनाका पोका छाडेर चिर निद्रामा डुबिन सदाका लागि सबैलाई रुवाएर ।
आफ्ना सन्तानको भविष्य उज्जल बनाउन कैयौं सुन्दर सपना बोकेर केही वर्ष अघि दक्षिण कोरिया आएकी थिइन् । भर्खरको कलकलाउदो उमेरमा ससाना छोराछोरीलाई नेपालमै छाडेर परदेसीएकी डोल्मा अचानक बोनम्यारो अभावमा अस्पतालको शैयामा छटपटाइरहिन् विगत लामो समयदेखि । आफ्ना ति अबोध बालबालिकाका लागि अझै बाँच्ने आशामा मृत्युसँग लडिरहिन् हरपल । सबतिर हारगुर मागिन् । तर, दैवको लेखा मृत्युको अगाडि कसैको केही जोड नचल्ने रहेछ । आखिर उनले आधा जवानीमै यो संसारलाई छाड्नु पर्यो । मृत्युसँग नराम्ररी हारिन् उनी । आफ्नो छोराछोरीलाई भेट्ने अधुरो चाहना मनमै लिएर भौतिक शरीरबाट बिदा भइन् । तर आमा गुमाएका ति सन्तानको हालत के होला अब ?
दोलखामा जन्मेकी डोल्मा सानोमा नर्स बनेर बिरामीको सेवा गर्ने सपना बुनेकी थिइन् । तर उनको सपना पुरा हुन नपाइ सिन्धुपाल्चोकका दोर्जे शेर्पासँग उनको विवाह भयो । विवाह पछि दुइ सन्तान जन्मे । उनीहरुको लालनपालनको लागि पैसा कमाउन श्रीमान परदेसिए । कहिले भारत त कहिले मलेसिया गएर कमाएको पैसा सबै काठमाडौंमा बसेर सकाए । घर कहिल्यै फर्केनन् नत पैसा नै पठाइदिए । घरपरिवारलाई चटक्कै बिर्सेर अर्कै युवतीसँग बस्न पल्केका दोर्जे तिनै युवतीसँग वैदेसिक रोजगार भिषामा पछिल्लो पटक कोरिया पनि आए । उता डोल्माले भने दुखः गर्दै छोराछोरीलाई हेर्दै घर धानिरहे ।
तर घरको कमजोर आर्थिक अवस्थाका कारण छोराछोरीको सुनौलो भविष्यको कल्पना गर्दै विदेसिने सोच बनाइन् । विदेसिनु त्यति सजिलो थिएन । त्यसैले अरुले सिकाइदिएको सजिलो माध्यम रोजिन् अनि छिरिन् ‘पेपर म्यारिज’ गरेर कोरिया । जसोतसो काम गर्दै थिइन् तर अचानाक महंगो बिरामीले छोयो उनलाई । शरीरमा रगत उत्पादन गर्ने बोनम्यारो अभावमा उनी सुवनको आजु अस्पतालमा भर्ना भइन् । उनको स्वास्थ्य बिमा नहुदा उनको उपचारमा धेरै पैसा खर्च भयो । उनको अवस्था थाहा पाएर कोरियामा रहेका मनकारी नेपाली तथा विभिन्न सामाजिक संघ संस्थाहरुले आर्थिक सहयोग गरे । तर, उनलाई बचाउन सम्भव भएन । उनले अन्तिम घडिसम्म मृत्युसँग संघर्ष गरिन् आफ्नो सन्तानको लागि । अन्ततः मृत्युको अगाडि कसको के लाग्छ र ? डोल्माको इहलीला यसरि प्रबासी भूमिमा समाप्त भयो | उनको आत्माले शान्ति पाओस् ।
