ईपीएस परीक्षा असोज पहिलो साता
देवेन्द्र सम्बाहाम्फे
सोल, रोजगार अनुमती प्रणाली (ईपीएस) अन्तर्गत छैटौं कोरियाली भाषा परीक्षा असोज पहिलो हप्तामा मात्र हुने भएको छ । एचआरडी कोरियाका प्रतिनीधी र नेपाली अधिकारीहरुले आइतबार वर्षा यामपछि मात्र परीक्षा संचालन गर्ने निर्णय गरे अनुसार असोज पहिलो हप्तामा हुने भएको हो । आइतबार भएको द्धीपक्षीय बैठकले गरेको निर्णय निर्देशक समितिमा पेश गरेपछि परीक्षा मिति निर्धारण हुनेछ ।
समितिको बैठक छिट्टै बस्ने ईपीएस शाखा नेपालका निर्देशक डिल्लीराम बास्तोलाले बताए । मध्य वर्षामा परीक्षार्थीको कठिनाइलाई मध्यनजर गरेर असोज पहिलो हप्ता परीक्षा संचालन गर्ने निर्णय गरिएको बास्तोलाको भनाइ थियो । कोरियन अधिकारीहरुले अझ पछि सार्ने प्रस्ताब ल्याए पनि नेपाली पक्षले परीक्षा छिटो संचालन हुनुपर्नेमा जोड दिएको थियो । ईपीएसको पुरानो कार्य तालिका अनुसार जेठ ३० र ३१ गते परीक्षा संचालन गर्न लागिएको थियो तर बैशाख १२ गते गएको विनाशकारी भूकम्पको कारण ४ महिना पछि सारिएको हो ।
२०१६ को कोटाबाट कोरिया भित्रयाउने गरि लिन लागिएको परीक्षाका लागि २०७२ बैशाख ३ देखि ६ गतेसम्म आवेदन संकलन गरिएको थियो । काठमाडौं उपत्यकाभित्र पाँच स्थान र उपत्यका बाहिर पाँच क्षेत्रबाट ५१ हजार ३ सय जनाले आवेदन फारम भरेका थिए । परीक्षा मिति सरेपछि परीक्षाफल प्रकाश मिति पनि हेरफेर हुने भएको छ ।
यो बर्षको परीक्षाबाट उत्पादनमुलक क्षेत्रतर्फ ४ हजार ९ सय र कृषि तथा पशुपालन क्षेत्रतर्फ २ हजार २ सय गरि ७ हजार १ सय अनुमानित उतीर्ण सङख्या एचआरडी कोरियाले तोकेको छ । बिगत बर्षहरुमा साउन महिनामा आवेदन संकलन गरेर असोजमा परीक्षा संचालन हुने गरेको थियो ।
त्यस्तै भूकम्पले ईपीएस सम्बन्धी कुनै काम प्रभावित नभएको ईपीएस शाखा नेपालले जनाएको छ । यस सम्बन्धी तालिम, श्रम करार सम्झौता, भिषा प्रकृया, उडान प्रबन्ध लगायत ईपीएससंग सम्बन्धित सम्पुर्ण काम नियमित रुपमा सम्पादन भइरहेको शाखाको बिज्ञप्तिमा जनाइएको छ । भूकम्प आए पछि मात्र करिब ८ सय नेपाली युवा कोरिया भित्रिएको निर्देशक बास्तोलाले बताए । ‘एचआरडी कोरिया र ट्राभल एजेन्सीसंग क्लोज कोअडिर्नेशन गरेर भए पनि कामदारलाई कोरिया पठायौं ।’ बास्तोलाले कान्तिपुरसंग फोनमा भने ‘भूकम्पले सिर्जना गरेको प्रतिकुल अवस्थामा पनि ईपीएस कार्यालयबाट हुने कुनै काम प्रभावित हुन दिएका छैनौं ।’
