ईपीएस परीक्षा असारको पहिलो हप्तामा
काठमाडौं -सन् २०१७ को ईपीएस भाषा परीक्षा आगामी असारको पहिलो हप्तामा सञ्चालन गर्ने तयारी भएको छ ।
श्रम तथा रोजगार मन्त्रालय अन्तरगतको इपीएस कोरिया शाखाले असारको पहिलो सातामा नै परीक्षा गर्ने तयारी गरिरहेको निर्देशक डिल्लीराम बास्तोलाले बताए ।
तर, औपचारिक मितिबारे निर्णय भने भएको छैन । श्रम तथा रोजगार मन्त्री दीपक बाहोरा अध्यक्षतामा बस्ने इपीएसको निर्देशक समितिको बैठकले औपचारिक मिति तोक्नेछ ।
मन्त्री बोहोरा अहिले प्रधानमन्त्री केही शर्मा ओलीसँगै चीन भ्रमणमा छन् । अबको दुईसाता भित्र परीक्षाको मिति तय हुने निर्देशक बास्तोलाले बताए ।
यसअघि नेपालले भदौमा परीक्षा गर्ने निर्णय गरेपनि पूर्नबिचार गर्न आग्रह गर्दै दक्षिण कोरियाले आसारमै परीक्षा गर्न नयाँ प्रस्ताव गरेको थियो ।
कोरियाको मानव संसाधन विकास विभाग (एचआरडी) ले असारमा नै परीक्षा लिईसक्नुपर्ने भन्दै इपीएस कोरिया शाखालाई पत्र लेखेको थियो ।
यसअनुसार आगामी बैशाखको दोस्रो हप्तामा भाषा परीक्षाको आवेदन माग गरिने उनले बताए ।
अनलाइन फारम भर्न नपाइने
यसवर्ष अनलाइनबाटै आवेदन लिने तयारी थियो । तर, छिटो परीक्षा हुन लागेकाले परीक्षार्थीले यो वर्ष पनि लाइन बसेरै आवदेन बुझाउनुपर्ने अवस्था आएको छ ।
अनलाइन प्रणाली विकास गर्न टेण्डर आह्वान भएपनि बैशाखसम्म त्यसलाई तयार गर्न नससिकने बास्तोलाले बताए । यसअघि शाखाले असारसम्म अनलाइन प्रविधि विकास गरेर त्यसैबाट आवेदन लिने योजना बनाएको थियो ।
घण्टौं लाइनमा बसेर आवेदन भर्नुपर्दा युवालाई गाह्रो भएको भन्दै सरकारले भाषा परीक्षाको आवेदन अनलाइमै बुझ्ने तयारी गरेको थियो ।
