भूकम्पपिडितको लागि सहयोग गर्न नेपाली जनसम्पर्क समितिको अपिल

यम श्रीष,सोल

नेपालमा शनिबार मध्याहृन आएको विनाशकारी भूकम्पले भएको मानवीय क्षति एवं अर्बौंको भौतिक सम्पतिको नोक्सानप्रति नेपाली जनसम्पर्क समिति,दक्षिण कोरिया गहिरो दुःख प्रकट गरेको छ । हजारौको निधन, अर्बौंको धनमाल नष्ट भइ हजारौं परिवार विस्थापित भएकोमा सम्पूर्ण पीडित परिवारजनप्रति हार्दिक सहानुभूति प्रकट गर्दै यस दुःखद घटनाबाट दिवंगत भएका व्यक्तिका परिवारजनप्रति हार्दिक समवेदना प्रकट गरेको छ । त्यस्तै दिवंगत आत्माको चिर शान्तिको कामना एवं घाइतेहरुको शिघ्र स्वास्थ्य लाभको कामना गर्नुका साथै भविष्यमा यस्ता प्रकारका विपदको जोखिमको रोकथाम तथा नियन्त्रणको लागि सरकारी स्तरबाट आवश्यक नीति, नियम तय गरी कार्यन्वयन गर्न गराउन पनि नेपाल सरकारको गम्भीर ध्यानाकर्षण गरेको छ ।

राष्ट्रिय संकटको यस दुःखद घडीमा पीडित परिवारजनको व्यवस्थापन तथा अन्य आवश्यक सहयोगमा बिश्व भरी छरिएर बस्ने नेपालीहरु एकतामा गांसिएर राहत सामग्री एवं आर्थिक सहयोग जुटाउन समेत अनुरोध गर्दै एक नेपालीलाई आकस्मिक विपद पर्दा अर्को नेपालीले सहयोग गर्नु हामी सबैको कर्तव्य र मानवीय धर्म हो भन्ने भावनाका साथ नेपाली जनसम्पर्क समितिले राहत संकलन अभियान सुरु गरेको छ ।

कोरियामा बस्नुहुने सम्पूर्ण नेपाली समुदाय सहयोगमा जुट्न हार्दिक अपिल गर्दै जनसम्पर्क समितिका सातवटै क्षेत्रका सभापति लगायत सम्पूर्ण सदस्यहरुलाई सशक्तरुपमा लाग्न आव्हान गर्दछ । सहयोग रकम यो बैंक को खाता मा जम्मा गर्न सक्नु हुनेछ !
Shinhan bank 신한은행 ,code no. 088 ac holder name – kunwar giri bahadur Ac/no.110-442-269707

नबराज शिवाकोटी
सभापति
नेपाली जनसम्पर्क समिती कोरिया