कोरियाको किम्हेमा “प्रथम लखन थापा फूटसल कप २०२६” मार्च १ मा हुने

कोरियाको किम्हे शहरको खेलमैदानमा नेपाल मगर संघ गणतन्त्र कोरिया किम्हे बुसान शाखाले आउँदो मार्च १ तारिक “प्रथम लखन थापा फूटसल कप २०२६” आयोजना गर्ने भएको छ । ४४ औं मगर दिवसको अवसर पारेर नेपाल फूटबल महासंघ दक्षिण कोरिया शाखाको विशेष सहजीकरणमा आयोजना हुने उक्त प्रतियोगिता कोरियामा रहेका नेपालीहरुको आत्मियता र बन्धुत्वको भावना अभिबृद्धि हुने अपेक्षा सहित किम्हेको खेलमैदान (경남김해시 김해대로 1798 (초은 풋살파크) मा सो प्रतियोगिता आयोजना गरिएको संस्थाका अध्यक्ष दिल बहादुर थापा मगर (दिलीप) ले बताए ।

प्रतियोगितामा प्रथम र द्धितीय हुने टिमले क्रमशः ३५ लाख र २० लाख कोरियन वोन सहित आकर्षक ट्रफी, मेडल र प्रमाण पत्र प्राप्त गर्नेछन् भने पछिल्लो पटक महिला फूटबल खेलको क्रेजलाई ध्यानमा राख्दै महिला तर्फ विजेता टिमलाई आकर्षक नगद पुरस्कार सहित ट्रफी, मेडल र प्रमाणपत्र प्रदान गरिने खेल संयोजक सनम मगरले जानकारी दिए । अन्य विधातर्फ खेल अवधिभरको उत्कृष्ट खेलाडी, गोलकिपर र सर्वाधिक गोलकर्ताले नगद १/१ लाख कोरियन वोन सहित ट्रफी, मेडल र प्रमाण पत्र प्राप्त गर्ने बताउँदै टिम दर्ता शुल्क ३ लाख ५० हजार कोरियन वोन कायम गरिएको र फेब्रुअरी २२ तारिकसम्म टिम दर्ता गर्न सकिने सोही संस्थाका कार्यक्रम संयोजक रोज खपाङ्गी मगरले जानकारी दिए ।

नेपाल मगर संघ कोरियाले कोरियामा रहेका मगर समुदायलाई एकताको सुत्रमा बाँध्दै आफ्नो जातीय भेषभूषा, कला, संस्कृति र अस्तित्व संरक्षणमा टेवा पुर्याउँदै विभिन्न संघसंस्था र संगठनहरुसँग समन्वय र सहकार्य गर्दै आइरहेको सन्दर्भ संस्थाका महासचिव पर्म सिंह घर्ति मगरले उल्लेख गरे ।

“स्वस्थ जीवन र मनोरञ्जनको लागि परदेश मै भएपनि खेल खेलौं” भन्ने नाराका साथ ४४ औं मगर दिवसको अवसर पारेर आयोजना हुने उक्त “प्रथम लखन थापा फूटसल कप २०२६” लाई सफल बनाउन कोरियामा रहनुहुने सम्पूर्ण खेलप्रेमीहरुमा संस्थाले उपस्थितिको लागि अनुरोध गर्दै आर्थिक नैतिक र भौतिक सहयोगको लागि सम्बन्धित सबैलाई आग्रह समेत गरेको छ ।