फेब्रुअरी १६ मा ‘बृहत सोनाम ल्होछार सांस्कृतिक कार्यक्रम २०२६’ हुने

सोल, दक्षिण कोरिया । नेपाल तामाङ घेदुङ दक्षिण कोरियाले मञ्जुश्री संवत् २८६२ ता ल्हो (घोडा वर्ग) को पावन अवसरमा ‘बृहत सांस्कृतिक कार्यक्रम-२०२६’ आयोजना गर्ने भएको छ। आगामी फेब्रुअरी १६ तारिखका दिन सोलस्थित वर्ल्ड के-पप सेन्टरको ग्लास हलमा यो कार्यक्रम सम्पन्न हुने घेदुङले जनाएको छ।

कार्यक्रमको उद्देश्यबारे जानकारी दिँदै नेपाल तामाङ घेदुङ दक्षिण कोरियाका महासचिव अभिषेक थिङ तामाङले ल्होछारलाई केवल उत्सवका रूपमा मात्र नभई सामाजिक उत्तरदायित्वसँग पनि जोडिएको बताएका छन्। कार्यक्रमबाट संकलित रकमले घेदुङले सञ्चालन गर्दै आएको ‘दीर्घकालीन शैक्षिक कल्याणकारी कोष’ लाई सहायोग गर्ने लक्ष्य राखिएको जानकारी दिँदै उनले भनेका छन्: “हाम्रो मुख्य उद्देश्य आर्थिक अवस्था कमजोर भएका जेहेन्दार विद्यार्थीहरूलाई शैक्षिक सहायता प्रदान गर्नु हो। आफ्नो भाषा र संस्कृतिको जगेर्ना गर्दै सामाजिक सेवामा हातेमालो गर्न म सम्पूर्ण कोरियाबासी नेपालीहरूलाई हार्दिक अपिल गर्दछु।”

कार्यक्रममा नेपालबाट आमन्त्रित चर्चित कलाकारहरू रोज मोक्तान, जितु लोप्चन, बिशाल काल्ताङ र किर्ती तामाङले विशेष प्रस्तुति दिने निश्चित भएको आयोजकले जनाएको छ। साथै, कोरियामा रहेका स्थानीय कलाकारहरूको मौलिक प्रस्तुतिले कार्यक्रमलाई थप आकर्षक बनाउने बताइएको छ।

“तामाङ भाषा, धर्म, कला, संस्कार, संस्कृतिको प्रवर्द्धन गरौँ, आफ्नो पहिचान र अस्तित्वको लागि एक हौँ” भन्ने मूल नाराका साथ हुन लागेको यस कार्यक्रममा कोरियामा रहेका विभिन्न संघ-संस्थाका प्रतिनिधि, व्यवसायी तथा नेपाली श्रमिकहरूलाई उपस्थितिका लागि घेदुङ कोरियाले अपिल गरेको छ।

कार्यक्रमको विवरण र ठेगाना:
* मिति: १६ फेब्रुअरी २०२६, सोमबार
* समय: दिउँसो ३:३० बजेदेखि
* स्थान: CREST 72 (World K-Pop Center Glass Hall) 서울특별시 중구 장충단로 72 (장충동2가)- (72, Jangchungdan-ro, Jung-gu, Seoul)