फोनिज कोरियाको चौथो अधिवेशन फेब्रुअरी ८ मा हुने
नेपाल आदिवासी जनजाति पत्रकार महासंघ (फोनिज) दक्षिण कोरियाको चौथो अधिवेशन आगामी फेब्रुअरी ८ तारिखमा हुने भएको छ। हालै बसेको कार्यसमितिको बैठकले अधिवेशनको मिति र स्थान तय गरेको हो।
कार्यवाहक अध्यक्ष उत्तम खजुमको अध्यक्षतामा बसेको बैठकले आगामी २०२६ फेब्रुअरी ८ तारिख, आइतबारका दिन सउलको दोङदेमुनस्थित ‘नेपाली थाइ रेस्टुरेन्ट’ को सभाहलमा अधिवेशन गर्ने निर्णय गरेको छ।
अधिवेशनको मिति सार्वजनिक गर्दै कार्यवाहक अध्यक्ष खाजुमले सोही दिन अन्य संघ-संस्थाहरूलाई आफ्ना कार्यक्रम नजुधाइदिन आग्रह गरे। उनले भने, “हामीले संस्थाको साङ्गठनिक सुदृढीकरण र नयाँ नेतृत्व चयनका लागि अधिवेशनको मिति तय गरेका छौँ, यसलाई सफल पार्न सबैको साथ र सहयोगको अपेक्षा गर्दछौँ।”
अधिवेशनलाई व्यवस्थित बनाउन कार्यसमिति र सल्लाहकारहरू तयारीमा जुटेका छन्। अधिवेशनका अन्य विस्तृत कार्यक्रम र प्रक्रियाका बारेमा केही समयपछि पुनः जानकारी दिइने संस्थाले जनाएको छ।
