पत्रकार महासंघ कोरियाको अधिवेशन अन्योलमा: असन्तुष्ट पक्षद्वारा ‘स्थगन’ को माग, अध्यक्ष भन्छन्– “तयारी पूरा भयो”
नेपाल पत्रकार महासंघ (एफ एन जे) दक्षिण कोरियाको आठौँ अधिवेशनको पूर्वसन्ध्यामा विवाद थप चर्किएको छ। एकातिर संस्थापन पक्ष अधिवेशन गर्ने अन्तिम तयारीमा छ भने अर्कोतिर असन्तुष्ट क्रियाशील पत्रकारहरूको समूहले केन्द्रको स्पष्ट निर्देशन नआएसम्म अधिवेशन स्थगित गर्नुपर्ने अडान राखेको छ।
असन्तुष्ट पक्षले विधान उल्लंघन, राजनीतिक हस्तक्षेप र सदस्यता नवीकरणमा विभेद भएको भन्दै आफ्ना माग र गुनासाहरू नेपाल पत्रकार महासंघको केन्द्रीय समिति (काठमाडौँ) मा पठाइसकेको जानकारी दिएको छ। उनीहरूका अनुसार केन्द्रबाट यस विषयमा स्पष्ट आधिकारिक पत्र वा निर्देशन नआएसम्म अधिवेशन अगाडि बढाउनु अवैधानिक हुनेछ।
विज्ञप्ति जारी गर्ने समूहले भनेको छ, “हामीले केन्द्रमा सम्पूर्ण वस्तुस्थिति जानकारी गराइसकेका छौँ। केन्द्रको निर्देशनलाई लत्याएर गरिने कुनै पनि गतिविधि मान्य हुँदैन। त्यसैले जबसम्म केन्द्रबाट स्पष्ट मार्गनिर्देशन आउँदैन, तबसम्मका लागि अधिवेशन स्थगित गरिनुपर्छ भन्ने हाम्रो स्पष्ट अडान छ।”
अध्यक्ष खड्काको दाबी: “कुरा मिलिसक्यो”
अर्कोतर्फ, महासंघका अध्यक्ष सन्तोष खड्काले भने देखिएका विवादहरू समाधान भइसकेको दाबी गरेका छन्। केही साथीहरूको नाम केन्द्रबाट आउन ढिलाइ भएकोले केही अन्योल देखिए पनि अहिले उक्त समस्या हल भइसकेको उनको भनाइ छ।
अध्यक्ष खड्काले भने, “३ जना साथीहरूको नाम लिस्ट विशेष कारणले केन्द्रबाट समयमै आउन नसकेका कारण केही विवाद देखिएको थियो। तर अहिले नामावली आइसकेको छ र धेरै कुराहरू मिलिसकेका छन्। केही बाँकी रहेका प्राविधिक विषयहरूलाई पनि मिलाएर तोकिएको समयमै अधिवेशन भव्यताका साथ सम्पन्न गर्नेछौँ।” उनले सबै पत्रकारहरूलाई एकताका साथ अधिवेशनमा सहभागी हुन समेत आग्रह गरेका छन्।
बहिष्कार र स्थगनको माग
यद्यपि, असन्तुष्ट पक्षले भने अध्यक्षको दाबीलाई अस्वीकार गर्दै बहिष्कारको निर्णय यथावत राखेको छ। उनीहरूले थप सदस्यहरूको नवीकरण, निर्वाचन समितिको पुनर्गठन र केन्द्रको स्पष्ट निर्देशन बिना कुनै पनि प्रक्रियामा सहभागी नहुने जनाएका छन्।
