आदिबासी जनजाति महासंघले चियापान र छुसकको कार्यक्रम बाँडफाँड गर्यो

नेपाल आदिबासी जनजाति महासंघ दक्षिण कोरियाले आइतबार सउलमा दक्षिण कोरियामा रहेका बिभिन्न संघसंस्थाहरुसँग चियापान तथा भेटघाट कार्यक्रम गरेको छ । सोही कार्यक्रममा आउँदो छुसकको लागि सांस्कृतिक कार्यक्रम बाँडफाँड गरेको छ भने महासंघमा मनोनित सल्लाहकारहरुलाई प्रमाण पत्र वितरण गरेको छ ।
दक्षिण कोरियामा रहेका सबै जातिय संस्थाका अध्यक्षहरु आदिबासी जनजाति महासंघमा पदेन सल्लाहकार रहने चलन रहेको छ । भने नयाँ कार्यसमितिले बिभिन्न संघ संस्थाका पदाधिकारीहरुलाई पनि सल्लाहकारको रुपमा मनोनयन गरेको छ । बरिष्ठ सल्लाहकारमा मल्लिका थकाली रहेकी छिन् भने प्रमुख सल्लाहकारमा चित्रबहादुर मोक्तान रहेका छन् ।
सोही कार्यक्रममा सेप्टेम्बरमा हुने छुसकमा जातिय संस्थाको तर्फबाट तमु धीं दक्षिण कोरियाले सांस्कृतिक कार्यक्रम गर्ने भएको छ । महासंघले आज गरेको छलफलमा सर्बसहमतिबाटै तमु धींलाई कार्यक्रम गर्न दिने निर्णय गरेको छ । ‘हामीले यो छुसकमा रहेको कार्यक्रम सबै संघसंस्थासँग मिलेर गर्छौ । सांस्कृतिक कार्यक्रम भब्य हुनेछ । के कसरी गर्ने भन्ने हामी छलफल गरेर पछि सबैलाई जानकारी गराउँछौ ।’ तमु धीं दक्षिण कोरियाका अध्यक्ष जीत गुरुङले भने । ‘अर्को महिना हामीले वनभोज कार्यक्रम राखेका छौ । त्यो बेला छुसकमा हुने सांस्कृतिक कार्यक्रमको पोस्टर सार्बजनिक गर्छौै ।’ उनले थपे ।
कार्यक्रममा सहभागी संघसंस्थालाई आयोजकका तर्फबाट महासंघका अध्यक्ष युगेल तेन्डुप शेर्पाले धन्यबाद दिदै सबै संस्थासँग सहकार्य गरेर जाने बताए । ‘हामी दक्षिण कोरियाका बिभिन्न संघसंस्थासँग मिलेर सहकार्य गर्छौ । आजको कार्यक्रम त्यसैको पहिलो रुप हो ।’ उनले भने । ‘हामी जातिय र अन्य संस्थाहरु संग सहकार्य गरेर जाने छौ । आज दक्षिण कोरियामा कार्यरत धेरै संस्थाका प्रतिनिधिहरु आउनु भएको छ । हामीले कसरी सहकार्य हुन सकिन्छ भनेर छलफल भएको छ ।’ उनले थपे ।