कोरियाले यसपाली १० हजार भन्दा बढी नेपाली कामदार ल्याउने, मूल्यांकनमा नेपाली अगाडि
दक्षिण कोरियामा सन् २०१९ मा १० हजार ५० जना नेपाली कामदार ल्याउने भएको छ।
सन् २००८ बाट रोजगार अनुमति प्रणाली (ईपीएस) अनुसार नेपाली कामदार ल्याइरहेको कोरियाले यस पटक सबैभन्दा बढी कोटा तोकेको हो ।
वैदेशिक रोजगार विभाग ईपीएस कोरिया शाखाका अनुसार उत्पादन क्षेत्रका लागि ७ हजार ५० र कृषि क्षेत्रका लागि ३ हजार कोटा निर्धारण गरिएको छ । कोरियामा कार्यरत विदेशी कामदारको मूल्यांकनमा नेपाली अगाडि देखिएपछि कोटा संख्या बढाइएको हो।
कोरियाले नेपालसहित १६ देशबाट प्रत्येक वर्ष ५० हजार कामदार आपूर्ति गर्छ। कामदार कोरिया जान ८ सय १५ अमेरिकी डलर खर्च हुन्छ। ‘अहिलेसम्मकै उच्च कोटा निर्धारण भएको पत्र प्राप्त भएको छ’ ईपीएस कार्यालयका एक अधिकारीले भने ‘नियमित तालिकाअनुसार परीक्षा लिइनेछ।’ नेपालले पारदर्शी ढंगले कामदार भर्नामा सहयोग गरेको भन्दै कोरिया सरकारले अवाई दिइसकेको छ।
कान्तिपुर दैनिकमा प्रकाशित समाचारको आधारमा
