नार्गाजुन गुम्बाले मनायो ग्याल्बो ल्होछार
दक्षिण कोरियामा रहेको नेपाली गुम्बा नार्गाजुन गुम्बाले मंगलबार ग्याल्बो ल्होछार २१४६ मनाएको छ । गुम्बाले प्रत्येक बर्षको कोरियन नयाँ बर्ष सलनालको दोस्रो दिन ल्होछार मनाउँदै आएको छ ।
बिहान १० बजे लामा गुरुहरुले पुजा गरेर सुरु भएको ल्होछार कार्यक्रम दिउँसो २ बजे सम्म चलेको थियो । लामा गुरुहरुको पुजा सकिए पछि नेपालबाट आएका ताम्बा गायक दावा बाङ्गेल मोक्तान, फूलकुमार बोम्जन र जीवन बोम्जनले डम्फुरे गीत र सेलो गाएका थिए ।
कार्यक्रममा बोल्दै नार्गाजुन गुम्बाका अध्यक्ष तथा लामा प्रमुख उर्गेन लामाले जसले ल्होछार मनाए पनि रमाइलो गरि मनाउनु पर्ने बताए । ‘हामी जहाँ जस्ले जसरी ल्होछार मनाए पनि ठीकै छ । ठाउँ र परिवेश अनुसार आफ्नो आफ्नो तरिकाले ल्होछार मनाउने गरेको सुनाए । हाम्रो लागि ल्होछार चाड हो । सबै जना हाँसी खुशी मनाऔ । दाजुभाइ दिदीबहिनी मिलौ । अरु सबै कुरा ठीक हुन्छ ।’ उनले भने ।
त्यस्तै सउल नेपाल गुम्बाका लामा प्रमुख कुन्साङ लामाले पनि सबै नेपालीलाई ल्होछारको शुभकामना दिए । कार्यक्रममा नेपाल तामाङ संघ दक्षिण कोरियाका अध्यक्ष मेघ वाईवा, नेपाल आदिबासी जनजाति पत्रकार संघ फोनिजका अध्यक्ष गोकुल थोकर, तामाङ पत्रकार संघ दक्षिण कोरियाका अध्यक्ष सिमा लामा, तामाङ समाज ख्याङ्सानाम्दो बुसानका अध्यक्ष विश्वास ब्लोन लगाएतका संघसंस्थाका प्रतिनिधिको उपस्थिती थियो । कार्यक्रममा नेपालबाट आएका कलाकारहरु दावा वाङ्गेल मोक्तान, फूल कुमार बोम्जन, जीवन बोम्जन, बिना घले तामाङ, टिका बोम्जन र जोगलाल लामालाई सम्मान गरिएको थियो ।
