दक्षिण कोरियामा अर्को नेपालीको सुतेकै अबस्थामा मृत्यू

दक्षिण कोरियामा फेरी अर्को नेपालीको सुतेकै अबस्थामा मृत्यू छ । वइजम्बुको प्लास्टिक कम्पनीमा काम गर्दै आएका पाँचथर मिक्लाजुङ गाउपालिका सराङडाँडाका सनोज सोभित आङ्देम्बेको शनिबार राति सुतेकै ठाँउमा मृत्यु हो ।
उनी आफ्नो पहिलो कार्यकाल सकाएर फेरी दक्षिण कोरिया आएका थिए । ‘कमिटेटमा आउनु भएको रहेछ । फेरी आउनु भएको पनि एक बर्ष हुनै लागेको रहेछ ।’ किराँत याक्थुङ चुम्लुङका अध्यक्ष सुन्दरदीप आङदेम्बेले भने । ‘स्वस्थ पनि खासै समस्या थिएन रे । सबै राम्रै थियो भन्छन् ।’ उनले थपे ।
मृतक काम गर्ने कम्पनीमा पाँच जना नेपाली छन् । उनीसँगै काम गर्ने विनम कुमार लिम्बुले हिजो बेलुकीको खानासँगै खाएको बिताए । ‘हामीले हिजो बेलुकी खाना सँगै बसेर खाएका थियौ । रातको १० बजे तिर छुट्टिएका हौ । त्यस पछि आआफ्नो कोठामा गएर सुत्यौ । आज देखि कोरियन भाषा पढ्न जानु थियो । त्यसैले मैले बिहान साढे ११ बजे तिर ढोका ढकढकाउँदा नखुले पछि कोठा फुटाएर हेर्दा घटनाको बारेमा थाहा भयो । त्यस पछि पुलिस आएर सबै कुरा हेरेर लासलाई पोष्टमार्टमका लागि लिएर गयो ।’ उनले भने ।
घटनाको खबर सुनेर कम्पनीमा पुगेका नेपाल आदिबासी जनजाति महासंघका उपाध्यक्ष गजेन्द्र शेर्माले कम्पनीमा बस्ने खाने सुबिधा राम्रै भएको बताए । ‘सिंगल सिंगल कोठा दिएको रहेछ । कोठाहरु पनि राम्रै छन् । यस्तो घटना भयो । खास के कारणले मृत्यू भएको भन्ने पोष्टमार्टम पछि मात्रै थाहा हुन्छ ।’ नेपाली दुताबासमा जानकारी गराएको पनि बताए । ‘दुताबासबाट भोली आउनु हुन्छ । त्यसपछि अरु प्रक्रिया अघि बढ्छ ।’ उनले भने ।
आइतबारै तेह्रथुम म्याङलुङ नगरपालिका १० निवासी योगेन पयाङ्गु लिम्बूको सम्झनामा दोङ्देमुन नेपाल हाउसमा श्रद्धाञ्जली सभासम्पन्न भएको छ । करिब ३० महिना अघि कोरिया आएका लिम्बूको गत डिसेम्बर २७ तारिखमा हृदयघातका कारण मृत्यु भएको थियो ।