कोरियाका आदिवासी जनजाति संघसंस्थाले सम्झिए पद्मरत्न तुलाधरलाई

दक्षिण कोरियामा रहेका जातिय संघसंस्था र नेपाल आदिवासी जनजाति महासंघले गत हप्ता निधन भएका आदिवासी जनजाति नेता पद्मरत्न तुलाधरको सम्झनामा श्रद्धाञ्जली सभा गरेका छन् । सउलको नेपाल हाउसमा आइतबार भएको श्रद्धाञ्जली सभामा विभिन्न जातीय संघ संस्थाका प्रतिनिधिहरूको उपस्थिति रहेको थियो ।
नेपाल तामाङ संघ दक्षिण कोरियाका सल्लाहकार दावा तामाङले तुलाधरले आफ्नो जीवन भरि नै पहिचान आन्दोलनको लागि विभिन्न चरणमा काम गरेको बताए । ‘उनले आफ्नो तर्फबाट गर्न सक्ने धेरै गरे । हाम्रो अहिलेको पहिचानको आन्दोलनमा उनको भुमिका महत्वपुर्ण छ ।’ त्यस्तै नेवा पुचःका अध्यक्ष पुरू जोशीले नेपालमा हुँदा तुलाधार आफ्नो क्षेत्रबाट प्रतिनिधित्व गर्दै प्रतिनिधि सभाका सदस्य भएको सम्झना गरे । ‘उहाँले हाम्रो विद्यालयमा आएर पुरस्कार दिनु भएको थियो । म सानै थिएँ । मसँग त्यो फोटो अझै सुरक्षित छ ।’ उनले भने ।
नेपाल आदिबासी जनजाति महासंघ दक्षिण कोरियाको कार्यवाहक अध्यक्ष मल्लिका थकालीले आदिवासी जानजातिको पहिचानमा तुलाधरले अमुल्य योगदान दिएको बताइन् । ‘हामी अहिले आफ्नो पहिचानको कुरा जुन तहमा राख्न सक्ने भएका छौ । यो उहाँको अमुल्य योगदानको प्रतिफल हो ।’
कार्यक्रममा गैर आवासीय नेपाली संघ दक्षिण कोरियाका अध्यक्ष लक्ष्मी गुरुङले मान्छे जहाँ पुगे पनि आफ्नो संस्कार संस्कृतिलाई भुल्न नसक्ने बताइन् । ‘हामी विदेशमा पनि हाम्रो समुदायका मानिसलाई हाम्रो कुरा गर्न सक्छौ । यो वातावरण बनाउन तुलाधरले खेल्नुभएको योगदान अमुल्य छ ।’
श्रद्धान्जली सभा कार्यक्रममा किरातं याक्थुङ चुम्लुङका वरिष्ठ उपाध्यक्ष मिरक लिम्बु, थारु कल्याण कारिणी सभाका अध्यक्ष शिब चाैधरी, नेपाल आदिवासी जनजाति महासंघ दक्षिण काेरियाका सचिव युगेल शेर्पा, नेपाल आदिवासी जनजाति पत्रकार महासंघ दक्षिण काेरिया शाखाका अध्यक्ष गाेकुल थाेकरले सम्बोधन गरेका थिए ।