कोरियामा सम्झिए मिनोद मोक्तान
दक्षिण कोरियामा विभिन्न संघसंस्थाले गत हप्ता हृदयघातका कारण मृत्यू भएका मानव अधिकारबादी गायक तथा स्टप क्र्याक डाउन व्यान्डका भोकलिस्ट मिनोद मोक्तान(मिनु) प्रति श्रद्धान्जली अर्पण गरेका छन् । आइतबार एमडब्लुटिभीको हलमा भएको कार्यक्रममा दक्षिण कोरियामा रहेका अधिकारबादी संघसंस्थाहरुको प्रतिनिधिहरुको उल्लेखनिय सहभागिता रहेको थियो ।
मोक्तान केबिएस टेलिभिजनमा विदेशीले कोरियन भाषामा गीत गाउने कार्यक्रममा भाग लिन कोरिया आएका थिए । त्यस पछि उनी झन्डै दुई दशक कोरियामा बसेका थिए । कोरियामा रहँदा सन् २००३ मा रक पप व्यान्ड स्टप क्र्याक डाउन स्थापना गरेका थिए । सो ब्यान्डले कोरियामा रहेका विदेशी कामदारका पीडा र उनीहरु माथि हुने थिचोमिचोलाई गीत मार्फत प्रस्तुत गरेका थिए । कोरियन सरकारले मोक्तानलाई सन् २००९ मा नेपाल डिर्पोट गरेको थियो ।
नेपालमा हुँदा समेत मोक्तान कोरियन भाषा पढाउने गर्थे भने कोरियामा रहेका प्रवासी मजदुरका पक्षमा निरन्तर लागि रहेका थिए । सन् २०१३ मा बनेको डकुमेन्ट्री द कोरियन ड्रिम र २०१६ मा बनेको कमिङ टु यु मिनुमा उनको जीवनका विभिन्न पक्ष हेर्न सकिन्छ ।
