दक्षिण कोरियामा पहिलो पटक तामाङ चलचित्र प्रर्दशन

नेपाल तामाङ संघ दक्षिण कोरियाले कोरिया पहिलो पटक तामाङ भाषाको चलचित्र सेम ताबा म्ही (मन परेको मान्छे ) प्रर्दशन गरेको छ । कोरियामा नेपाली चलचित्र प्रदर्शन हुने भए पनि भाषाभाषीको चलचित्र पहिलो पटक प्रदर्शन भएको हो । चलचित्र बुसान, थेगु र सुवनमा प्रदर्शन गरिएको हो ।
आइतबार सुवन भएको कार्यक्रममा सोही चलचित्रका निर्देशक राजकुमार मोक्तानको कबिता संग्रह म र मेरो देश कार्यक्रमका प्रमुख अतिथि कोरियाको लागि नेपाली राजदुत अर्जुनजंग बहादुर सिंहले विमोचन गरे ।
कार्यक्रममा बोल्दै राजदुत सिंहले नेपाल बहुभाषी, बहुजाति र बिबिध खालको संस्कृति बोकेको देश भएकोले चलचित्रले यस्ता कुरालाई देखाउन सके राम्रो हुने बताए । ‘हामी पूर्व मेची देखि महाकालीसम्मका नेपालीको आफ्नै संस्कार र संस्कृति छन् । आफ्नै सभ्यता पनि छ । यी सबैलाई हामीले संरक्षण गर्ने माध्यम चलचित्र र पुस्तक हुन ।’ उनले भने ।
चलचित्र निर्देशक राजकुमार मोक्तानले आफ्नो पहिलो चलचित्रलाई सबैले मन पराई दिनु भएकोमा धन्यबाद दिए । साथै दक्षिण कोरियामा चलचित्र प्रर्दशनीबाट उठेको रकम रामेछापको शेरपलिङ महायान बौद्ध धर्म अध्ययन केन्द्रमा अध्ययनरत बालबालिकाहरुको सहयोगको लागि खर्चिने प्रतिबद्धता जाहेर गरे ।
कार्यक्रमलाई नेपाल तामाङ संघ दक्षिण कोरियाका अध्यक्ष मेघप्रसाद वाईवा, उपाध्यक्ष राजीव घिसिङ, सल्लाहकार चित्रबहादुर मोक्तान, दावा तामाङ र जनजाति महासंघ दक्षिण कोरियाका उपाध्यक्ष बाबुलाल मोक्तानले सम्बोधन गरेका थिए ।