फेसबुकद्वारा युट्युबमा जस्तै लाइभ भिडियो लन्च
काठमाडौं-सामाजिक सञ्जाल फेसबुकले पनि लाइभ भिडियो सुविधा ल्याएको छ। फेसबुकले सार्वजनिक व्यक्तित्वका लागि लाइभ भिडियो सेयर गर्ने नयाँ सुविधा लन्च गरेको हो।
फेसबुक ब्लगमा लेखिएको छ, ‘आज हामी लाइभ, फेसबुकमा आफ्ना प्रशंसकसँग जोडिने र भिडियो सेयर गर्ने एउटा नयाँ सुविधाको सुरुवात गर्न पाउँदा उत्साहित छौं। लाइभमार्फत पब्लिक फिगरहरुले आफ्ना प्रशंसकलाई आफूसँगै लिएर हिँड्न सक्छन्, प्रश्नोत्तर गर्न सक्छन्, नयाँ कुराको घोषणा गर्न सक्छन् र यो काम एकैचोटी गर्न सक्छन्।’
फेसबुकका अनुसार हरेक दिन खेलाडी, संगीतकार, गीतकार, राजनीतिज्ञ र अन्य सार्वजनिक व्यक्तित्वहरुले फेसबुक मेन्सन्स् मार्फत आफ्ना प्रशंसकसँग जोडिने, घटना बाँड्ने गर्न सक्छन्। फेसबुकमा ९ सय मिलियनभन्दा बढी मान्छेहरु पब्लिक फिगरसँग जोडिएका छन्।
फेसबुकले आफ्नो नयाँ सुविधाका बारे लेखेको छ, ‘तपाइँ स्थापित सेलिब्रेटी हो या प्रशंसक बनाउने चाहना छ भने लाइभ आधिकारिक रुपमा तपाइँका प्रशंसकसँग जोडिने एउटा नयाँ बाटो हो। जब तपाइँ लाइभ भिडियोको सुरुवात गर्नुहुन्छ यो तपाइँका प्रशंसकको फेसबुक न्युज फिडमा देखा पर्नेछ र त्यसमा प्रशंसकले लाइक्स, कमेन्ट र अरुलाई शेयर गर्न सक्नेछन्।’
भिडियो प्रत्यक्ष प्रसारण गरिरहेका बेला युट्युबमा जस्तै फेसबुकमा पनि कति जनाले भिडियो हेरिरहेका छन् भन्ने हेर्न सकिनेछ। भिडियोमा आएका लाइभ कमेन्टको जवाफ दिन र कमेन्ट हाइड गर्न सकिने सुविधा यसमा राखिएको छ। लाइभ सकिएपछि भिडियो फेसबुकमा पब्लिस हुनेछ। भिडियो पब्लिस गर्ने वा नगर्ने अधिकार भने सेलिब्रेटीसँगै हुनेछ। मन नलागेको भिडियोलाई पब्लिस नगरी डिलिट गर्न सकिनेछ |-एजेन्सी
