दिदी र भाइको त्याग र माया छ डाईङ्ग क्यान्डलमा : निर्माता तथा सिनेमाटोग्राफर रविन आचार्य

दिदी र भाइको जीवन्त कथालाई नेपाली चलचित्र डाईङ्ग क्यान्डल अर्थात निभ्न लागेको दियोले उजागार गरेको छ । जसमा चप्पल छिनेर बतिमा जोड्न खोज्दा हात डढेको अनि एउटा सानो चकलेटलाई फुटाएर भाग लाएर खाएको कुरा सामान्यजस्तो लागेपनि फिल्ममा कुदिएको दिदीभाइको त्याग र माया देखेर दर्शकको आंखा रसाउन सक्छ ।दिदी सिर्जना सुब्बा र भाइ बनेका लाक्पा सिङ्गे तामाङको वरिपरि घुमेको छ चलचित्र ।

रसुवाको बिकट गाउँ गत्लाङमा छायाङ्कन गरिएको चलचित्रमा तामाङ संस्कृति, पराम्परासँगै स्थानीय मानिसले भोग्नु परेको अप्ठ्यारालाई पनि देखाइएको छ । सौगात मल्ल,अर्पण थापा र सिर्जना सुब्बाको मुख्य भूमिका रहेको फिल्मलाई सिनेमाटोग्राफर रबिन आचार्यले आकर्षक ढंगले प्रस्तुत गरेका छन ।दुई वटा अन्तराष्ट्रिय अवार्ड जित्न सफल फिल्म सुकर्म समूह दक्षिण कोरियाले सउल दोङ्देमुन कुमीन् ह्वेग्वानमा ३० अक्टोबर आइतबार बिशेष प्रर्दशनी गर्दैछ ।यसैं विषयमा निर्माता तथा छायांकार रविन आचार्यसंग ऐश्वर्य श्रेष्ठले गर्नु भएको कुराकानीको सारांश ।

डाईङ्ग क्यान्डल अर्थात निभ्न लागेको दियो कस्तो फिल्म हो ?
दिदी र भाइले एक अर्का प्रति गरेको त्याग र मायालाई फिल्ममा देखाएईको छ ।

यो फिल्मले दुईवटा अन्र्तराष्ट्रिय अवार्ड जित्नमा फिल्मको कुन पक्ष सवल रहयो भन्ने लाग्छ तपाईलाई ?

यसको कथा वस्तु सवल छ र फिल्म मेकिंगमा अध्ययन गरेका साथीहरुको समुहले निर्माण गरेको हुनाले यो फिल्मको सबैं पक्ष नैं समग्रमा सवल छ । यो फिल्मले पिस अवार्ड र बेस्ट सिनेमाटोग्राफी अवार्ड जित्न सफल भयो त्यतिमात्र नभएर बेस्ट फिल्म र बेस्ट Actress सिर्जना सुब्बा समेत नोमिनेशनमा परेको फिल्म हो ।
डाईङ्ग क्यान्डलको कोरियामा विशेष प्रर्दशन गर्दै हुनुहुन्छ नेपालमा चाही कहिले प्रर्दशन गर्नुहुन्छ ?

कोरियास्थित सुकर्म समुहले प्रदेशमा बसेका दाजुभाइ दिदी बहिनीले फिल्म हेरेर नेपालमा रहेका दाजु भाइ दिदी बहिनीलाई संझन सकुन् भनेर कोरियामा लक्ष्मी पुजाको दिन पारेर यो फिल्म देखाउदैंछ ,भने नेपालमा पुस अन्तिम वा माघमा प्रर्दशन गर्ने तयारीमा छौं ।यो फिल्म कोरियनले मन पराएर चासो देखाएकोले कोरियामा पहिले प्रर्दशन गर्न लागिएको हो ।

कोरियाबासी नेपाली दर्शकको कस्तो अपेक्षा गर्नु भएको छ ?

पहिलो कुरा त सुकर्म समुहले फिल्मको साथमा देउसी भैंलो सांस्कृतिक कार्यक्रम गर्दैछ भने दिदी बहिनीहरुबाट ईच्छुक दाजुभाइहरुलाई भाइ टिका लगाईदिने,भाइ मसला र मिठा खानाको साथमा दिदी भाइको कथा समेटिएको फिल्म हेर्ने सु अवसर दिदैंछ । तसर्थ सबैं जना अक्टोबर ३० मा सोलस्थित दोङ्देमुन कुमीन् ह्वेग्वान्मा आइदिन आग्रह गर्न चाहन्छु साथैं फिल्म हेरेर प्रतिक्रिया दिनुहुनेछ भन्ने लागेको छ ।

अन्तमा के भन्न चाहनुहन्छ ?

यो फिल्मलगतैं सम्पुर्ण काम सकिसकेको फिल्म ‘ केटिएम ककटेल’ मार्चमा प्रर्दशन हुदैंछ भने कोरियाबाट नेपाल गएपछि ‘चक्कर’ फिल्म छायांकन गर्ने योजनामा छु । यहांहरुको माया र साथको अपेक्षा सधैं रहीरहनेछ ।