कोरियाबाट अवैधानिक कामदारलाई फर्कन ३ महिना थप
सोल-दक्षिण कोरियाले अवैधानिक कामदारलाई २०१६ को अन्त्यसम्ममा फिर्ता हुन समय दिएको छ | अझै पनि थुप्रै अवैधानिक विदेशी कामदार रहेकाले उनीहरूलाई स्वदेश फर्कने मौका दिन पहिला तोकिएभन्दा तीन महिना समय थपिएको हो ।
कोरियाले गत अप्रिलदेखि अवैधानिक कामदारलाई घर फकाउने अभियान सुरु गरेको हो । अवैधानिक कामदार यसै वर्षको अन्त्यसम्म स्वदेश फिर्ता भएको अवस्थामा दण्ड जरिबाना मिनाहा गरिने सोलस्थित न्याय मन्त्रालयले जानकारी दिएको छ ।
विगत पाँच महिनामा २८ हजार अवैधानिक कामदार स्वदेश फर्किसकेको अध्यागमन विभागले जनाएको छ । यो संख्या अघिल्लो वर्षको तुलनामा दोब्बर हो । आशा गरिएभन्दा बढी अवैधानिक कामदारले कोरिया छोडेका कारण समय तीन महिना थप गरिएको मन्त्रालयले जनाएको छ । सोही अभियानलाई निरन्तरता दिँदै तोकिएको समयमा फिर्ता हुनेलाई पुनः कोरिया प्रवेशको अवसर दिइएको मन्त्रालयले जारी गरेको सूचनामा उल्लेख छ ।
स्वदेश फिर्ता हुन इच्छा भएका अवैधानिक कामदारसँग पासपोर्ट र प्लेन टिकट मात्रै भए पुग्ने मन्त्रालयले जनाएको छ । नेपाली कामदाको फिर्तादर बढ्न थालेको नेपाली दूतावासले जानकारी दिएको छ । सोलस्थित दूतावासले विगत पाँच महिनामा एक सय ५८ वटा ट्राभल डकुमेन्ट जारी गरेको छ । एमआरपी पासपोर्ट बनाएर फर्कने अवैधानिक नेपाली कामदारको संख्या पनि विगतभन्दा बढेको दूतावासले स्पष्ट पारेको छ ।
ओभरस्टे कामदारमध्ये कतिपयले बिना पासपोर्ट ट्राभल डकुमेन्टका आधारमा फिर्ता हुने गरेको कार्यबाहक राजदूत किरण शाक्यले जानकारी दिए । दूतावासका अनुसार अवधि सकिएको वा हराएको पासपोर्टका लागि तीन लाख ७५ हजार वन राजस्व दस्तुर लाग्छ भने ट्राभल डकुमेन्ट ७५ हजार वनमा तयार हुन्छ ।
नेपालबाट कोरियामा भएका उच्चस्तरीय भ्रमणका क्रममा कोरियाली पक्षले अवैधानिक नेपाली कामदार घटाउन निरन्तर दवाव दिँदै आएको थियो । गत जुन ८ मा भएको दुई पक्षीय वार्तामा परराष्ट्र सचिव शंकरदास बैरागीसँग कोरियाली डेपुटी श्रम मन्त्री पार्कजंग गिलले अवैधानिक कामदार घटाउन आग्रह गरेका थिए । इन्फोकोरियाले गत अप्रिलदेखि अवैधानिक कामदारलाई घर फकाउने अभियान सुरु गरेको हो ।
